2020 jylǵa deıin barlyq óńirde 1-sanattaǵy avtojoldar bolady - Joldaý

ASTANA. QazAqparat - Respýblıkalyq mańyzy bar ınfraqurylym qalyptasty. Endigi kezek - óńirlerde. Halyqqa arnalǵan bıylǵy Joldaýyn jarııalaý kezinde Memleket basshysy Nursultan Nazarbaev osylaı málimdedi, dep habarlaıdy QazAqparat tilshisi.

Onyń aıtýynsha, qazirgi qalalardyń ınfraqurylymdary kásiporyndar men halyqtyń tez ósip jatqan qajettiligine úlgermeı jatyr.

«Nurly jol» baǵdarlamasy boıynsha sońǵy jyldary respýblıkalyq mańyzy bar ınfraqurylymdy qalyptastyrdyq. 2015 jyldan bastap úsh jylda respýblıka boıynsha 2 400 shaqyrym avtojol salyndy jáne jóndeýden ótkizildi. Bul jumystar jalǵasady, 2020 jylǵa deıin qosymsha 4 600 shaqyrym jol salynady jáne jóndeledi. Osylaısha, tutas el birinshi sanattaǵy avtokólik joly jelisimen qamtylady. Dál osy qadam halyqty jaqyndastyrady, bıznestiń damýyna, óz taýarlaryn satýǵa múmkindik beredi», - dep atap ótti Prezıdent.

Elbasynyń aıtýynsha, endi óńirlik, qalalyq ınfraqurylymdardy damytý kerek.

«Bul úshin bıyl qarjylandyrýdy jergilikti mańyzy bar joldarǵa - 150 mlrd tengege deıin, aýyldardy sýmen qamtýǵa 100 mlrd teńgege deıin ulǵaıtý kerek. Oblys ishindegi aýdandar arasynda joldardyń sapasy nashar. Barlyq jerge avtoban salý mindet emes, qazirgi joldardy júrýge bolatyndaı qalpyna keltirý kerek», - dedi Nursultan Nazarbaev.

Sonymen birge, Prezıdent halyqty tolǵandyryp júrgen ózekti máselelerge basymdyq berýdi tapsyrdy.

«Bólingen qarajat arqyly ákimder eń aldymen, óńirlerdegi kúıip turǵan máselelerdi sheshýi kerek. Úkimet te bul mindetke júıeli qarap, ózekti ınfraqurylymdyq máselelerdi jınap, jobalardy qarastyryp, qarjylandyrý tetigin ázirleýi qajet. Aýyzsý, turǵyn-úı kommýnaldyq máseleler, jol - aýyl adamdaryn tolǵandyratyn máseleler osy», - dedi Nazarbaev.

Aıta keteıik, Memleket basshysy Nursultan Nazarbaevtyń bıylǵy Joldaýy ádettegideı, elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.