2020 jyldan bastap baqylaý-kassalyq mashınalardy qoldaný kimderge mindetteledi
«2020 jyldyń 1 qańtarynan bastap baqylaý-kassalyq mashınalardy qoldaný mindeti patent negizinde arnaıy salyq rejimin qoldanatyn salyq tóleýshilerge jáne biryńǵaı jer salyǵyn tóleýshilerge engiziledi.
Búgingi tańda «patent ıeleri» men biryńǵaı jer salyǵyn tóleýshiler sany 513 512-ge jetti. Onyń ishinde 338 636-sy – patent, al 174 876-sharýa qojalyqtaryna tıesili. Solardyń arasynda BKM-dy 76 552 salyq tóleýshi paıdalanyp keledi», - dedi R. Eńsebaev Úkimet úıinde ótken baspasóz máslıhatynda.
Onyń sózine qaraǵanda, qalǵan eki aıda osy baǵytta belsendi jumys júrgizý kerek. Osylaısha, búgingi kúni 436 990 patent ıeleri men sharýa qojalyǵy 2020 jyldyń 1 qańtarynan bastap qoldanýǵa mindetti, olarmen birge BKM tirkeý jumystaryn júrgizý qajet.
Mınıstrlik málimetinshe, 2020 jylǵy 1 qańtardan bastap Onlaın baqylaý-kassalyq mashınalaryn qoldanýǵa mindetti salyq tóleýshilerdi qamtýdy barynsha arttyrý maqsatynda ortalyq jáne aımaqtyq deńgeılerde shtab quryldy, onyń quramyna barlyq baqylaý-kassalyq mashınalardy satýshylar men óndirýshiler, bıznes-qaýymdastyqtardyń ókilderi, «Atameken» UKP jáne jergilikti atqarýshy organdardyń ókilderi kirdi. Qurylǵan shtab bazarlar men saýda oryndarynda túsindirý jumystaryn júrgizetin bolady.
Aıta keteıik, onlaın-BKM qoldanǵan kezde salyq aýyrtpalyǵyn azaıtý maqsatynda patent pen jeńildetilgen deklaratsııa negizinde arnaıy salyq rejimin qoldanatyn uıymdar úshin Onlaın-BKM satyp alǵan kezde tólengen salyq somasy Onlaın-BKM qunyna azaıady. Biraq jylyna tólengen salyq somasynyń 50%-nan aspaýy kerek. Bul ereje bir kúntizbelik jylǵa (2019 jyldyń sońyna deıin) jaramdy.