2019 jyly memlekettik satyp alý boıynsha 17 myń shaǵym tústi - mınıstrlik
«Qazirgi ýaqytta barlyq satyp alý protsedýralarynan 2% ǵana zańbuzýshylyq tabylǵan, al buryn árbir úshinshi satyp alýdan qate tabylatyn. Sonymen birge, veb-portalda memlekettik satyp alýlar nátıjesi boıynsha elektrondy shaǵym qaldyrý múmkindigi engizildi. Endi memlekettik satyp alýlarǵa shaǵym túsirip, onyń barysyn veb-portal arqyly baqylaýǵa bolady», - dedi QR Qarjy vıtse-mınıstri Rýslan Beketaev Úkimette ótken baspasóz máslıhatynda.
Onyń aıtýynsha, elektrondy shaǵym engizgenshe orta esppen 2 myń shaǵym túsetin. Al 2019 jyldyń alǵashqy 7 aıynda elektrondy jolmen 17 myń adam aryzdanǵan.
«Mundaı ósim kásibı «shaǵymdanýshylardyń» paıda bolýymen de baılanysty. Olar úshin elektrondy shaǵymdaný memlekettik satyp alýdy úzip, zańsyz paıda kórý quralyna aınaldy. Bul máseleni sheshý úshin Qarjy mınıstrligi Memlekettik satyp alýlar týraly zańǵa shaǵymdanýdy aqyly etý týraly ózgeris engizýdi kóterdi. Bul tájirıbe Eýropa elderinde, Armenııa men Grýzııada jáne Ýkraınada keńinen qoldanylady. Sonymen birge, Qarjy mınıstrligi shaǵymdy qabyldaǵan jaǵdaıda tólengen qarajatty qaıtarýdy usyndy. Kerisinshe, shaǵym negizsiz bolsa, qarajat bıýdjetke ketedi», - dep túsindirdi spıker.
Bul ózgerister 2019 jyldyń 1 qańtarynda engizildi jáne memlekettik satyp alýlar veb-portalyn qoldaný aqyly júıege aýysty. Búgingi kúnge deıin yqtımal jetkizýshilerden 3,6 mlrd teńge tústi.
«Osyǵan baılanysty, veb-portaldyń – Elektrondy qarjy ortalyǵy jaqynda birqatar bastamany júzege asyrýdy josparlap otyr. ıAǵnı, portaldyń baılanys ortalyǵynyń qyzmeti táýlik boıy júrgiziledi. Árbir satyp alýdy tekseretin moderatorlyq ınstıtýty engiziledi. Osylaısha, tehnıkalyq aqaýlar deńgeıi tómendeıdi. Sonymen birge, portalda sms-habarlandyrý júıesi engizilip, taýarlar men qyzmetterdiń biryńǵaı respýblıkalyq anyqtamalyǵy qurylady», - dedi Rýslan Beketaev.