2019 jyly qansha «Bolashaq» stıpendııasy beriledi

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen Shetelde kadrlardy daıyndaý jónindegi respýblıkalyq komıssııanyń otyrysy ótti, dep habarlaıdy QazAqparat tilshisi.

«Elbasy Nursultan Nazarbaev «Memlekettiń barlyq bastamalary halqymyzdyń turmys deńgeıin jaqsartýǵa baǵyttalǵan. Jurttyń sapaly bilim alyp, suranysqa ıe mamandyǵy men laıyqty jumysy bolǵanda ǵana ál-aýqatymyz artady», dep jaqynda Joldaýynda atap ótti. Osy maqsatta biz «Bolashaq» baǵdarlamasymen de jumys isteımiz. Ózderińiz bilesizder, jazǵy konkýrs kezinde barlyǵy 413 stıpendııa taǵaıyndaldy. Endi búgin biz jańa túsken aryzdardy qaraımyz», - dedi otyrysty ashqan Memlekettik hatshy.
 

Komıssııa otyrysy aıasynda Shetelde kadrlardy daıarlaý jóninjegi respýblıkalyq komıssııanyń hattamalyq tapsyrmalarynyń  oryndalýy týraly Bilim jáne ǵylym mınıstrliginiń esebi tyńdaldy. Sonymen qatar «Bolashaq» baǵdarlamasynyń iske asyrylýyna qatysty birqatar másele qarastyryldy.

Komıssııanyń sheshimimen basym mamandyqtardyń 2019 jylǵy tizbesi bekitildi. Ol 155 mamandyqtan turady. «Bolashaq» halyqaralyq stıpendııasy aıasynda taǵlymdamadan ótý úshin belgilengen sanattar anyqtaldy. 2019 jylǵa 555 stıpendııa bekitildi.

Sonymen qatar búgingi otyrystyń nátıjesinde stıpendııa magıstratýra men doktorantýrada oqýǵa, álemniń jetekshi ǵylymı jáne óndiristik ortalyqtarynda taǵlymdamadan ótýge jiberiletin  71 úmitkerge taǵaıyndaldy.
 

Otyrys qorytyndysynda Gúlshara Ábdiqalyqova «Bolashaq» halyqaralyq stıpendııasyn iske asyrýdy odan ary jalǵastyrýǵa qatysty birqatar tapsyrma berdi.