2019 jylǵy saılaý saıası taptyń jańarý trendine dálel bolady - Erlan Qarın

NUR-SULTAN. QazAqparat - Prezıdenttikke kandıdattardyń basym bóliginiń saılaýǵa alǵash ret qatysýy saıası taptyń jańarý trendine dálel bolady. Bul týraly QR Prezıdentiniń keńesshisi Erlan Qarın Telegram-daǵy paraqshasynda jazdy, dep habarlaıdy QazAqparat tilshisi.

«Sonymen, búgin sońǵy kandıdat tirkeldi. Tirkeý kezeńi resmı áli de aıaqtalmaǵanyna qaramastan usynylǵandardyń barlyǵy da qol qoıý paraqtaryn jınap, tirkelip úlgerdi. Al bul Prezıdenttik laýazymǵa úmitkerlerdiń short-paraqshasy merziminen buryn anyqtaldy degendi bildiredi»,- dep jazdy ol.

Sonymen qatar Erlan Qarın 2019 jylǵy saılaýdyń ereksheligi bul ǵana emestigine nazar aýdartady.

«Kandıdattardyń eń kóp sany tirkeldi - 7. Bir úmitker emtıhan tapsyra almady, taǵy biri ózdiginen bas tartty. Osylaısha, tirkeý kezeńinen kandıdattyq ótinimderdiń 80 paıyzǵa jýyǵy ótti. Іs júzinde barlyq kandıdattar (bireýinen basqasy) prezıdenttik saılaýǵa alǵash ret qatysyp otyr. Bul saıası taptyń jańarý trendine dálel bola alady. Saılaý naýqanynyń belsendi kezeńinde saıası kúshterdiń barlyq negizgi palıtrasy - solshyl, ońshyldar, ortalyqshyl, sonymen qatar alǵash ret ulttyq-patrıottyq blok kandıdaty saılaýǵa qatysady», - dedi saıasattanýshy.

Onyń paıymynsha, osylaısha ashyq ári básekege toly saılaý ótetindigi naqtylanyp otyr. Kandıdattar sanynyń kóp bolýy saılaý protsesiniń belsendi kezeńine elimizdegi negizgi saıası kúshterdiń, onyń ishinde oppozıtsııanyń da qatysatynyn bildiredi.

«Kandıdattardyń basym bóligi saılaý naýqanyna alǵash ret qatysyp otyr, jańa tulǵalar paıda boldy. Soǵan oraı saılaýshylarda saılaý úshin ártúri balama bolady», - dedi E.Qarın.

Aıta keteıik, 2019 jyldyń 9 maýsymynda ótetin kezekten tys prezıdenttik saılaýǵa 7 kandıdat tirkeldi. Aldymen qazirgi is basyndaǵy Prezıdent Qasym-Jomart Toqaev kandıdat retindegi kýáligin aldy.

Odan keıin «Uly dala qyrandary» respýblıkalyq qoǵamdyq mádenı-áleýmettik birlestigi prezıdenttikke kandıdat retinde usynǵan Sádi-Bek Túgel de barlyq synnan súrinbeı ótip, Prezıdenttikke kandıdat atandy.

Elimizdiń Kásipodaqtar federatsııasy atynan shyqqan úmitker Amangeldi Taspıhov ta Almaty men Shymkentten basqa elimizdiń 15 óńirinen 119 577 rastalǵan qol jınaı alyp, kandıdat retinde tirkeldi.

Kandıdat kýáligin alǵan «aqjoldyq» Dánııa Espaeva el tarıhynda alǵashqy áıel kandıdat retinde qalatyndyǵy anyq.

Al búgin Jambyl Ahmetbekov, Tóleýtaı Rahymbekov jáne Ámirjan Qosanov prezıdenttik saılaýda kandıdat retinde tirkelgeni belgili boldy.