2019 jylǵa qaraı Qazaqstanda jumysshy mamandyǵyna oqıtyn stýdentter 40 paıyzǵa artady

ASTANA. QazAqparat - 2019 jylǵa qaraı Qazaqstandaǵy kolledjderde jumysshy mamandyǵy boıynsha oqytylatyn stýdentter sanyn 20-dan 40 paıyzǵa arttyrý josparlanady.

Bul týraly búgin Májiliste tegin tehnıkalyq jáne kásibı bilim berý tetigin engizý máselelerine arnalǵan dóńgelek ústelde QR Bilim jáne ǵylym mınıstri Erlan Saǵadıev málim etti.

Mınıstrdiń aıtýyna qaraǵanda, jyl saıyn mektep bitiretin 21 myń túlek arnaıy bilimi bolmaı, joǵary oqý ornyna da túse almaı eńbek naryǵyna tap bolady. Olardyń ishinde 3,8 myńǵa jýyǵy birden jumyssyzǵa aınalady. «Sondyqtan da, bizdiń maqsatymyz osy mektep bitiretin 21 myń adamdy ózimizdiń júıe arqyly ótkizý. Osyǵan baılanysty tegin kásibı jáne tehnıkalyq bilim berý úlgisi qurylyp otyr. Bul rette Bilim jáne ǵylym mınıstrligi men jergilikti ákimdikterdiń granttary jumysshy mamandyqtary boıynsha bólinetin bolady. Sosyn olar konkýrs negizinde eń tómengi sanattar boıynsha bólinedi», - dedi mınıstr.

Onyń aıtýynsha, bundaı júıe jumysshy mamandyqtary boıynsha oqyp jatqan balalardy búgingi 20 paıyzdan 2019 jylǵa qaraı 40 paıyzǵa deıin arttyrýǵa septigin tıgizedi.