2019 jylǵa deıin túzetý ortalyqtarynyń sanyn 220-ǵa jetkizý mindeti tur - Ábdiqalyqova
Ortalyqtyń ashylý rásimine QR Memlekettik hatshysy Gúlshara Ábdiqalyqova, joǵary oqý oryndarynyń basshylary men úkimettik emes uıym ókilderi qatysty.
«Qazaqstan múgedekterdiń quqyǵyn qorǵaý týraly Konventsııaǵa qosylyp, Elbasy qujatty 2015 jyly ratıfıkatsıalaǵan bolatyn. Bul sharanyń mańyzy óte zor. 2016 jyly bilim jáne ǵylym salasynda úlken baǵdarlama qabyldanǵan bolatyn. Baǵdarlamaǵa sáıkes osyndaı pedagogıkalyq-psıhologııalyq túzetý ortalyqtaryn ashý mindeti qoıyldy. Respýblıka boıynsha búginde 176 kabınet ashylǵan. 2019 jyly olardyń sanyn 220-ǵa jetkizý josparda bar. Elbasymyz aıtqandaı, balalarǵa kedergisiz orta jasaýda osy ortalyqtyń úlesi zor bolmaq», - dedi Memlekettik hatshy Gúlshara Ábdiqalyqova.
Memlekettik-jekeshelik áriptestik aıasynda ashylǵan ortalyqta bir jylda 200-ge jýyq bala túzetý sharasynan ótedi. Sonymen qatar, bul ortalyq bolashaq pedagogıkalyq mamandardyń tájirıbe alatyn alańy bolyp tabylady.
Jańa kabınette jeke jáne toptyq oqýlar júrgiziletin bolady. Munda kózi nashar kóretin, qulaǵy estimeıtin, tili, tirek-qımyl apparaty, aqyl-esi kem, oqýdy meńgerýde qıynshylyqtary bar, tártibinde jáne psıhıkalyq damýynda bóget bar árbir bala psıhologtyń, sýrdopedagogtyń, logopedtiń, massajıstiń, defektologtyń keshendi bilikti kómegin ala alady.
«Elbasy Bilim berý salasyna kóp mindetter qoıyp otyr. Osy Qazaq qyzdar pedagogıkalyq ýnıversıteti bazasynda «Dara» qaıyrymdylyq qory túzetý ortalyǵyn ashyp, múmkindigi shekteýli balalardy kásibı qoldaý jaǵyn qolǵa alyp otyr. Bizdiń maqsatymyz ınklıýzıvti bilim berý ustanymyn iske qosyp, múmkindigi shekteýli balalardy bilim berýmen qamtamasyz etý», - dedi ýnıversıtet rektory Aldambergenova Gaýhar.
Aıta ketý kerek, osy maqsatta qalalyq Bilim berý basqarmasy, Qazaq memlekettik qyzdar pedagogıkalyq ýnıversıteti men «Dara» qaıyrymdylyq qory 3 jaqty memorandýmǵa qol qoıǵan.
«Ýnıversıtet túzetý kabıneti úshin 300 sharshy metr jaı bóldi. Almaty ákimdigi tarapynan 14 shtattyq birlik bólindi. Buǵan 28 mln teńgeden astam qarajat saldyq. «Dara» qory osy kabınetterdi tolyq jabdyqtap berip otyr. Bul - Almatyda ashylyp otyrǵan 9-kabınet. Qalada erekshe qajettiligi bar balalardyń sany 3000-nan asady», - dedi qalalyq Bilim basqarmasynyń basshysy Gúlnar Qojabergenova.
Munda jarymjan jáne múgedek sábıler men jetkinshekter emdelip, emdik-saýyqtyrý sharalary júrgiziledi. Bul qyzmetterdiń barlyǵy da tegin kórsetiledi. Balalarǵa tıflopedagog, logoped, defektolog, psıholog, dene shynyqtyrý mamandary tegin qyzmet jasaıdy. Ortalyqta pedagogtarmen qatar stýdentter de jasóspirimderdiń turmystyq-áleýmettik daǵdylaryn qalyptastyrýǵa kómektesip qana qoımaı, olardy balabaqsha men mektepke daıyndaıdy.