2019 jyldan beri jastarǵa jalǵa berilgen páterlerdi satyp alý múmkindigi bola ma
«Búgingi saýalym jyry basylmaǵan jastarǵa berilgen jalǵa alynǵan páter jaıly bolmaq. 2019 jyly, ıaǵnı Jastar jylynda jastar qýana qabyl alǵan, jumysshylarǵa berilgen bul páterler qazir olardyń basty máselesine aınalyp otyr. 2019 jyldan beri Astana, Almaty, Shymkent qalalarynda jalǵa beriletin páterge ornyqqan jastardyń sany 10 000-ǵa jýyqtady. Bul aýdan halqymen parapar ekenin eskersek, nazar aýdararlyq másele bolyp otyr. Bul joba jastarǵa óz baspanasyn alýǵa qarjy jınaý maqsatynda berilgen úlken múmkindik edi. Áıtse de, Úkimet bul baǵdarlamany qabyldaǵanda, ózge de faktorlardy eskerýdi nazardan tys qaldyrǵan syńaıly. 2019 jyly osy páterlerdi jalǵa alǵan jastardyń baspanany bosatýyna da 1 jyldan az ýaqyt qaldy. Sondyqtan megapolısterdegi jastardyń dalada qalý qaýpi joǵary», - dedi D. Muqaev Úkimet basshysynyń birinshi orynbasary Roman Sklıardyń atyna joldaǵan saýalynda.
Onyń aıtýynsha, 2019 jyly osy baspanany jalǵa alǵan jastarda álemdik pandemııa kezindegi shekteýler aıasynda qarajat jınaý múmkindigi bolmady. Baǵdarlama eń alǵashynda 5 jylǵa berilse, keıingi jyldary 3 jylǵa taǵy qysqardy.
«Qazir elimizde ınflıatsııa deńgeıi de sharyqtap, úı baǵasy jyldan jylǵa ósti. Ekinshiden, jastar saıasaty týraly zańǵa engizilgen ózgeristerge sáıkes, jastar sanaty 29 jastan 35 jasqa deıin ósti. Sáıkesinshe úı alǵan jastar búgin de jastar sanatynan shyqpady. 5 jylda balaly bolǵan jastar qanshama? Olar bala-shaǵamen qaıda barmaq? Al, elde jastarǵa arnalǵan biryńǵaı memlekettik baspana baǵdarlamasy joq. Úshinshiden, páterdi jalǵa alǵan jastar ózge de memlekettik baǵdarlamalar men úı kezeginde turý múmkindiginen aıyrylǵan. Tórtinshiden, qazir elde baspana alýǵa tıimdi baǵdarlama joqtyń qasy. Men bul máseleni 1 sessııada da kótergen edim. «7-20-25» aty bar da, zaty joq baǵdarlamaǵa aınaldy. Al Otbasy bank arqyly jastarǵa 50% bastapqy jarna jınaý 5 jylda múmkin emes. 2019-2020 jyldardan beri naryqtaǵy úı baǵasy 2 ese ósken», - dedi depýtat.
Onyń paıymynsha, joǵarydy atalǵan faktorlardy eskere otyryp, jastardyń tıimdi baspana alýyna jaǵdaı jasaý jáne kemi 10 paıyzdyq bastapqy jarnamen ózderi turyp jatqan baspanasyn satyp alýǵa múmkindik berý máselelesin qarastyrý kerek.