2019-2021 jyldary muǵalimder ústemeaqysyna 528,8 mlrd teńge baǵyttalady

ASTANA. QazAqparat - Aldaǵy jyly muǵalimderdiń eńbekaqysyna qosymsha tólem jasaýǵa 126,7 mlrd teńge bólinedi. Bul týraly «NurOtanTrends» pikirtalas klýbynyń otyrysynda «Elbasy Joldaýy: qoǵamdy ortaq maqsattarǵa qalaı jumyldyramyz?» taqyrybyn talqylaý kezinde Bilim jáne ǵylym vıtse-mınıstri Ashat Aımaǵambetov málim etti, dep habarlaıdy QazAqparat.

«Memleket basshysy Joldaýynda Úkimet pen mınıstrlik aldynda eńbekaqyny ósirý maqsaty qoıyldy», - dep toqtaldy vıtse-mınıstr.
Onyń sózine qaraǵanda, 2018 jyldyń 1 qańtarynan bastap jańartylǵan mazmun jaǵdaıyndaǵy jumysy úshin muǵalimderge qyzmettik eńbekaqysynan 30 paıyz kóleminde ústemeaqy belgilendi. Sonymen qatar, bıylǵy 1 qyrkúıekten biliktiligine qaraı qyzmettik eńbekaqysynan 30-35-40-50 paıyz mólsherinde pedagogıkalyq sheberligi dárejesine qosymsha tólem bekitildi.
«Osy maqsattarǵa respýblıkalyq bıýdjetten 2018 jylǵa 49,8 mlrd teńge 208 myń muǵalimge bilim berýdiń jańartylǵan mazmuny jaǵdaıyndaǵy jumysy úshin ústemeaqyǵa bólindi. Munymen qosa, jańa júıe boıynsha attestatsııadan ótken 34 myń muǵalimniń pedagogıkalyq sheberliginiń biliktilik sanatyna 4,2 mlrd teńge qosymsha tólemge baǵyttaldy», - dep naqtylady A. Aımaǵambetov.
Atap aıtqanda, bul qosymsha aqyny tóleý aıasynda 2019 jyly 126,7 mlrd teńge 316 myń muǵalimge, 2020 jyly 186,5 mlrd teńge 343 myń muǵalimge, sondaı-aq 2021 jyly 215,6 mlrd teńge 339 myń muǵalimge qarastyrylǵan.
Budan bólek ol pedagogtardy qyzmetine tán emes jumystarǵa tartý problemasy tóńireginde sóz qozǵady.
«Eger de pedagogtardy qyzmetine tán emes jumystarǵa tartý máselesine toqtalsaq, shyn máninde bul jaǵdaı problema bolyp tur jáne ony jasyrý durys emes», - dedi Ashat Aımaǵambetov.
Esterińizge sala keteıik, 2018 jylǵy 5 qazandaǵy Qazaqstan Resýpblıkasynyń Prezıdenti Nursultan Nazarbaev Qazaqstan halqyna Joldaýyn jarııalady.