2018 jyly Qazaqstannyń eki aýdanynda halyq sanaǵy ótedi

ASTANA. QazAqparat - 2018 jyly Qazaqstannyń eki aýdanynda halyq sanaǵy ótedi. Bul týraly búgin Zań jobalaý qyzmeti máseleleri jónindegi vedomstvoaralyq komıssııa otyrysy aıasynda QR Ulttyq ekonomıka mınıstrligi Statıstıtka komıtetiniń tóraǵasy Nurbolat Aıdapkelov málim etti, dep habarlaıdy QazAqparat. 

«2020 jyly jahandyq halyq sanaǵy ótedi. Biz oǵan qazirden bastap daıyndalýdamyz. 2018 jyly Qazaqstannyń eki óńirinde, atap aıtqanda Aqmola oblysynyń Býrabaı aýdany men Shyǵys Qazaqstan oblysynyń Aıagóz aýdanynda ilki halyq sanaǵyn ótkizemiz. Bul rette ol 2020 jylǵy jappaı halyq sanaǵyna daıyndyq bolady. Іlki halyq sanaǵy barysynda biz ózimizdiń ádisnamalarymyzdy, aqparat jınaý tásilderimizdi shyńdap, qandaı jerde qatelik, kemshilik bar ekendigin elekten ótkizemiz. Al 2020 jyly negizgi halyq sanaǵyn ótkizý josparlanǵan», - dedi komıtet basshysy.

Onyń atap ótýinshe, halyq sanaǵy barysynda zamanaýı tehnologııalar qoldanylatyn bolady.

«Halyq sanaǵynyń 30 paıyzy ınternet arqyly saýalnama túrinde júrgiziledi. Qalǵan 70 paıyzy planshetke aqparat jınaý túrinde júzege asyrylady», - dedi Aıdapkelov.

Onyń atap ótýinshe, 2020 jyly ótken jalpy halyq sanaǵyna qansha qarjy jáne qansha adam jumyldyrylatyndyǵy áli belgisiz. Ol osy kúzde respýblıkalyq bıýdjetti naqtylaý barysynda belgili bolady.

Aıta keteıik, vedomstvoaralyq komıssııa otyrysynda «Memlekettik statıstıka máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasynyń tujyrymdamasy qaraldy. Tujyrymdamada zańnyń túsinikteme bólimin keńeıtý, atap aıtqanda «baǵalardy tirkeý», «halyq sanaǵy», «aýyl sharýashylyǵy sanaǵy», «arnaıy qurylǵan komıssııa» uǵymdaryn ashý, bul rette «ulttyq sanaq» uǵymynyń qoldanystaǵy redaktsııasyn ózgertý usynylǵan.