2018 jyly Qazaqstanda tranzıttik jolaýshylar 1 mln-ǵa jýyqtaıdy

ASTANA. QazAqparat - 2020 jylǵa qaraı tranzıtten túsetin qarajat bes mıllıard dollarǵa deıin artady. Búgin Parlament Senatynyń jalpy otyrysynda QR Investıtsııalar jáne damý mınıstri Jeńis Qasymbek osylaı málim etti, dep habarlaıdy QazAqparat.

«Elbasynyń tapsyrmasyna sáıkes, biz 2020 jylǵa qaraı tranzıtten túsetin qarajatty bes mıllıard dollarǵa deıin ulǵaıtýymyz kerek. Búginde ol soma 1,5 mıllıardy qurady. Sońǵy 2-3 jyldyń ishinde Qytaıdan Eýropaǵa Qazaqstan arqyly baratyn tranzıt jyl saıyn eki esege ósip jatyr. 2020 jylǵa deıin Memleket basshysynyń tapsyrmasyn oryndaımyz dep josparlap otyrmyz», - dedi vedomstvo basshysy.

Osy oraıda mınıstr júk tranzıtinen bólek, sonymen qatar jyl saıyn Qazaqstan arqyly áýe kóligimen saparlaıtyn tranzıttik jolaýshylardyń da sany artyp kele jatqanyn atap ótti.

«Byltyr 600 myń adam Eýropadan Azııaǵa jáne basqa baǵyttarda Qazaqstan arqyly ótti. Bıyl tranzıttik jolaýshylar 900 myń adamǵa jetedi dep boljap otyrmyz», - dedi Jeńis Qasymbek.

Aıta keteıik, jalpy otyrysta «Qazaqstan Úkimeti men Ázerbaıjan Úkimeti arasyndaǵy Halyqaralyq avtomobıl qatynasy týraly kelisimdi ratıfıkatsııalaý týraly» zań jobasy talqylanyp, qabyldandy.

J. Qasymbektiń sózine qaraǵanda, búginde 41 shet elmen avtomobıl qatynasy jónindegi kelisim bekitildi. 2017 jyly avtokólikpen júk tasymaly kólemi Qazaqstan men Ázerbaıjan arasynda 31 paıyzǵa artty.