2018 jyly Kaspıı qubyr konsortsıýmy arqyly Qazaqstannyń 54,3 mln tonna munaıy jiberildi

ATYRAÝ. QazAqparat - 2018 jyly Qazaqstannyń 54,3 mln tonna munaıy KQK arqyly Novorossııskige jiberildi, dep habarlaıdy QazAqparat tilshisi.

«Byltyr Kaspıı qubyr konsortsıýmy arqyly teńiz termınalynan Novorossıısk portyna tasymaldanǵan 61 mln tonna munaıdyń 54,3 mln tonnasy Qazaqstannyń munaı kenishterinen óndirildi. 2018 jyly eń kóp munaı bergen Teńiz ken orny boldy. Odan 28,7 mln tonna munaı óndirildi. Qashaǵannan 13,2 mln tonna, Qarashyǵanaqtan 10,3 mln tonna munaı alyndy», - dep málimdedi kompanııanyń baspasóz qyzmeti.

Aıta keteıik, KQK qubyr júıesi - TMD aýmaǵynda energetıka salasynda sheteldik kapıtaldyń qatysýymen iske asyrylǵan eń iri ınvestıtsııalyq jobalardyń biri. Teńiz - Novorossıısk qubyrynyń uzyndyǵy - 1 511 km. Qazaqstan eksportqa shyǵaratyn jalpy munaıdyń úshten ekisi osy baǵdarmen tasymaldanady.

Avtory: A. Sokolov