2018 jylǵy Azııa oıyndaryna 30 eldiń boksshylary qatysady

ASTANA. QazAqparat - Indonezııada ótetin XVIII Azııa oıyndary boks dodasynyń bastalýyna 55 kún qaldy. 22 tamyz kúni Djakartaǵa qurlyqtyń 30-dan astam eliniń boksshylary jınalady, dep habarlaıdy QazAqparat Azııa Boks konfederatsııasyna silteme jasap. 

Osy sport túrinen Azııa oıyndaryndaǵy júlde sany boıynsha jalpy 111 medal jınaǵan Ońtústik Koreıa kósh bastap tur.

«Qazaqstandyq boksshylar altyn medal sany boıynsha qurlyq birinshilikteriniń úzdik úshtigine kiredi. Osy oraıda aıta ketken jón, Qazaqstan Azııa oıyndaryna 1994 jyldan bastap qana qatysa bastady. Qazaqstandyq boksshylar úshin 2014 jylǵy Azıada tabysty boldy. Sol jyly Qazaqstannyń erler quramasy 6 altyn medaldy jeńip alǵan edi. Áıelder boksy Azııa oıyndarynyń baǵdarlamasyna 2010 jyly engizildi. Onda úsh salmaq kategorııasy boıynsha da qytaılyqtar úzdik boldy. Al 2014 jylǵy oıyndarda eki salmaq sanatynda Qytaı sportshylary chempıon bolsa, taǵy bir salmaqta Ońtústik Koreıa ókili jeńimpaz atandy», - deıdi Azııa Boks konfederatsııasynyń atqarýshy dırektory Baǵdáýlet Tórehanov.

Boks dodasy 22 tamyzdan 1 qyrkúıekke deıin ótedi. Al jalpy Azııa oıyndary Djakarta jáne Palembang qalalarynda 18 tamyzdan 2 qyrkúıekke deıin jalǵasady.