2018 jylǵa qaraı apattyq mektepter men úsh aýysymdy oqytý joıylady

ASTANA. QazAqparat - Bilim berý salasyndaǵy ınfraqurylymǵa 33 mlrd. teńge bólinedi. Bul týraly búgin Ortalyq kommýnıkatsııalar qyzmetinde «Nurly jol» baǵdarlamasyn iske asyrý máselesine arnalǵan brıfıngte QR Ulttyq ekonomıka mınıstriniń birinshi orynbasary Marat Qusaıynov málim etti.

«Bilim berý salasyndaǵy ınfraqurylymdy damytýǵa Ulttyq qor qarajaty esebinen 33 mlrd. teńge bólinedi. Atalǵan qarajat mektepterdi, balalarǵa arnalǵan mektepke deıingi mekemelerdi salýǵa jáne JOO-da ǵylymı zerthanalardy qurýǵa baǵyttalady»,- dedi ol.

Nátıjesinde, orta bilim berý júıesinde Ulttyq qordyń qarajaty esebinen apattyq mektepterdiń ornyna jáne úsh aýysymda oqytýdy joıý úshin óńirlerde jalpy bilim beretin jańa mektepter salynady jáne paıdalanýǵa beriledi.

«Jalpy, Ulttyq qordyń, respýblıkalyq bıýdjettiń jáne jergilikti bıýdjetterdiń qarajaty esebinen mektepter salýdy eskere otyryp, 2018 jylǵa qaraı apattyq mektepter men úsh aýysymdy oqytý joıylady. Atalǵan is-sharalardy Bilim berýdi damytýdyń 2011-2020 jyldarǵa arnalǵan memlekettik baǵdarlamasynyń is-sharalarymen qatar iske asyrý aldaǵy úsh jyl ishinde 3-ten 6 jasqa deıingi balalardy mektepke deıingi tárbıeleýmen jáne oqytýmen qamtýdy keminde 85 paıyzdyq deńgeıge deıin ulǵaıtýǵa múmkindik beredi», - dep atap ótti M.Qusaıynov.

Atap aıtqanda, memlekettik baǵdarlamasyn mamandandyrylǵyn kadrlarmen qamtamasyz etý úshin bazalyq dep aıqyndalǵan 10 joǵary oqý orny janynan 24 jańa zerthana qurylady. Barlyq zerthanalar álemdik standarttardyń talaptaryna saı keletin bolady.