2018 jylǵa deıin bes oblystaǵy 70 eldi meken gazben qamtylady - Energetıka mınıstri

ASTANA. QazAqparat - 2016-2018 jyldary elimizdiń bes oblysynda 70 eldi meken gazben qamtylady. Al 2016-2020 jyldar aralyǵynda «QazTransGaz» ulttyq operatorynan qosymsha qarjy ala otyryp, taǵy tórt oblystaǵy halyq sany kóp 14 eldi mekendi gazben qamtýǵa múmkindik týady. Qazaqstanda mınıstrlerdiń arasynda alǵashqylardyń biri bolyp, halyq aldynda esep bergen Energetıka mınıstri Qanat Bozymbaev osylaı habarlady.

«Gaz salasyna toqtalsam, 2015 jyly  bul sala damýǵa bet aldy. 45,3  mlrd tekshe metr gaz alyndy. Osy jyldyń tórt aıynda óndirilgen gaz kólemi 15,5 mlrd tekshe metrdi qurady. Elimizdi gazdandyrý - basty strategııalyq baǵyt ekeni belgili. Jalpy, byltyrǵy kórsetkishke súıene otyryp aıtsam, Qazaqstannyń 43 paıyzy gazben qamtylǵan», - deı kele mınıstr osy saladaǵy josparǵa toqtaldy.

 «2016-2018 jyldary Batys Qazaqstan, Qostanaı, Almaty, Qyzylorda, Jambyl oblystarynda 70 eldi meken gazben qamtylady. 2016-2020 jyldar aralyǵynda eldi gazdandyrý úshin «QazTransGaz» ulttyq operatory esebinen qosymsha qarjy alamyz. Osylaısha, Aqtóbe, Mańǵystaý, Qyzylorda, Ońtústik Qazaqstan oblystaryndaǵy 14 iri eldi mekendi gazben qamtı alamyz. Indýstrııalyq-ınnovatsııalyq damý baǵdarlamasynyń aıasynda «Beıneý-Bozoı-Shymkent» gaz qubyrynyń bir jelisi iske qosylǵan. Joba tolyq qýattylyqqa kóshke soń, elimizdiń ońtústigindegi alty júzge jýyq eldi mekeni gazben qamtylady. Sonymen qatar, Qytaıǵa gaz eksporttaı alamyz»,-dep habarlady Energetıka mınıstri.

Q.Bozymbaev atap ótkendeı, elimizde kógildir otynnyń baǵasy  «Gaz jəne gazben qamtý týraly» zańǵa sáıkes, taýarlyq gazdyń shekti kóterme baǵasy belgilenedi. Ol baǵa elimizdiń barlyq oblysy úshin birdeı bolady.