2018 jyldyń eń aqyldy oqýshylary anyqtaldy
Baıqaýdy QR Tuńǵysh Prezıdenti - Elbasy qory men Memlekettik tildi damytý qory jarııalaǵan.
QR Tuńǵysh Prezıdenti - Elbasy qorynan málim etkendeı, «Kim bilgish?» týrnıri «Rýhanı jańǵyrý» baǵdarlamasy aıasynda ótti.
Jobanyń maqsaty - oqýshylardyń ıntelektýaldyq jáne tanymdyq qabiletterin yntalandyrý, shyǵarmashylyq jáne bilim deńgeıin kóterý, IT salada bilimderin qalyptastyrý, daryndy balalardy anyqtaý jáne qoldaý, básekelestik rýhyn damytý, sonymen qatar oqýshylardyń bos ýaqytyn tıimdi ótkizýge yqpal etý.
Týrnır úshinshi ret ótkizilýde. Aldyńǵy eki oıyn nátıjesi boıynsha respýblıkanyń túrli aımaqtarynan kelgen joǵarǵy synyptyń 22 oqýshysy baǵaly syılyqtar aldy.
«Kim bilgish?» týrnıri sátti joba bolǵandyqtan, oıyn jyldan-jylǵa tanymal bolyp keledi. Sol sebepti ony 2019 jyly da ótkizý josparda bar» - dedi QR Tuńǵysh Prezıdenti - Elbasy qory dırektorynyń orynbasary Sultan Aıtjanov.
Aıta keteıik, «Kim bilgish?» oıyny 30 myńnan astam suraqtan turatyn mobıldik qosymsha. Onda sport, HH ǵasyr, HHІ ǵasyr, álem, óner, Qazaqstan tarıhy, Qazaqstan tabıǵaty, densaýlyq, ǵylym taqyryptary qamtylǵan. Eki kezeńnen turatyn týrnır onlaın túrinde, jazǵy demalys kezinde ótti.
Bıyl oǵan 7 myńǵa jýyq mektep oqýshysy qatysty. Fınalǵa eń kóp upaı jınaǵan 8 oqýshy ótti. Aqtyq oıyn Astana qalasynda boldy. Ol jerde úzdik oıynshylar erýdıtsııa jáne jyldamdyq boıynsha jarysty.
Osylaısha, qazaqtildi oıynshylar arasynda birinshi orynǵa Oral qalasynan 11-synyp oqýshysy Isabek Muratov, ekinshi orynǵa Almaty qalasynan 11-synyp oqýshysy Nuraısha Qaıysbekova, úshinshi orynǵa Shymkent qalasynan 10-synyp oqýshysy Ámirjan Qudaıbergen ıe boldy.
Orystildi oıynshylar arasynda birinshi oryndy Semeı qalasynan 11-synyp oqýshysy Anton Manýlenko, ekinshi oryndy Almaty oblysynan 10-synyp oqýshysy Ramılıa Ahmet, úshinshi oryndy Almaty qalasynan 10-synyp oqýshysy Erasyl Ernaruly ıelendi.
Týrnır jeńimpazdaryna «2018 jyldyń eń aqyldy oqýshysy» dıplomdary, noýtbýk, planshet, smartfon sııaqty baǵaly syılyqtar tabystaldy.