2018 jyldan beri temirjol ótkelderindegi apattan 22 adam zardap shekken
«Qazirgi tańda ortaq qoldanystaǵy qazaqstandyq joldarda avtokólik joldarymen qıysatyn 1 myńǵa tarta temirjol ótkeli bar. Respýblıkalyq jelilerde mundaı qıylystardyń sany - 139. Avtokólik joly men poıyz joly bir núktede qıysqan kezde, árıne, atalǵan ótkelderdi kesip ótý erejelerin qatań saqtaý kerek. Poıyzdyń ótkelge jaqyndaǵanyna 2,5 shaqyrym qalǵan kezde baǵdarshamnyń ótýge tyıym salynatyn túsi janady, shlagbaým túsedi de, kólik quraldary toqtaýy tıis. Ótkeldi qorshaıtyn qurylǵysy bar temirjol ótkelderinde bári avtomatty túrde iske qosylyp, kólikter qaýipsiz tártipte toqtaıdy», - dedi Indýstrııa jáne ınfraqurylymdyq damý mınıstri Roman Sklıar OQK-da ótken baspasóz máslıhatynda.
Mınıstrdiń aıtýynsha, temirjol ótkelderindegi erejelerdi jetildirý jumysyn qaraı jalǵastyn tappaq.
«Biraq, ol erejelerdi jetildirý jumysyn biz ary qaraı jalǵastyra beremiz. 2018 jyldan beri mundaı ótkelderde 9 jol-kólik oqıǵasy tirkelip, onyń saldarynan 2 adam kóz jumdy, 20 kisi ártúrli dene jaraqatyn aldy. Osy jyldyń 8 aıynyń qorytyndysy boıynsha, bul jaǵdaıdy qosqanda 6 oqıǵa tirkelip, 1 adam qaıtys boldy, 15 adam zardap shekti. Biz bul jaǵdaıda qosymsha qaýipsizdik sharalaryn qabyldaý úshin jumysty kúsheıte beretin bolamyz», - dedi mınıstr.
Eske sala ketsek, keshe Shamalǵan stansasynda poıyz ben avtobýs soqtyǵysqan bolatyn.
Oqıǵa ornynda avtobýs júrgizýshisi mert bolyp, taǵy 3 adam Qarasaı aýdandyq aýrýhanasynyń jansaqtaý bólimine jatqyzyldy.
Qazir atalǵan fakti boıynsha QR QK 345-babynyń 3-tarmaǵymen is qozǵalyp, tergeý júrip jatyr. Іsti Bas kóliktik prokýratýra baqylaýyna aldy.
QR Prezıdenti Qasym-Jomart Toqaev Aqseńgir-Shamalǵan temirjol ótkelinde poıyz ben avtobýs soqtyǵysynan zardap shekkenderdiń týǵan-týystaryna kóńil aıtty.