2018 jyldan áskerılerdiń baspana máselesin sheshýde oń nátıje kútiledi

ASTANA. QazAqparat - 2017 jyldyń jeltoqsanynda Memleket basshysy áskerı qyzmettiń bedelin, áskerı qyzmetshiler men olardyń otbasylarynyń áleýmettik-quqyqtyq mártebesin kóterýge baǵyttalǵan «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» QR Zańyna qol qoıdy. Osy oraıda endi 2018 jyly baspanasyz áskerıler ótemaqy esebinen páter alady.

Budan buryn habarlanǵandaı, atalǵan Zańnyń  Parlament Senatynyń jalpy otyrysynda talqylaý barysynda QR Qorǵanys mınıstriniń orynbasary Talǵat Muhtarov áskerılerdiń baspanaly bolýynyń mán-jaıyn egjeı-tegjeıli túsindirgen bolatyn. Zańnyń maqsaty men mańyzy - turǵyn úıge muqtaj barlyq áskerı qyzmetshilerdiń sanattaryn jeke baspanamen qamtamasyz etý. Qarastyrylyp otyrǵan tetikterge toqtalsaq, áskerı qyzmetshilerge ekinshi deńgeıli bankterdegi jeke arnaýly esep-shotyna aı saıyn turǵyn úı tólemderi aýdarylatyn bolady. Turǵyn úı tólemderiniń mólsheri elimizdiń tıisti óńirindegi baspananyń 1 sharshy metr qunyn áskerı qyzmetshiniń otbasy músheleriniń árqaısysyna tıesili paıdaly aýdan normalaryna, ıaǵnı bir adamǵa shaqqanda 18 sharshy metrge kóbeıtý arqyly esepteledi.

Áskerı qyzmetshiler osy turǵyn úı tólemin (baspanany jalǵa alǵany úshin ótemaqy - red.) kelesi maqsattarǵa jumsaı alady: ıpotekalyq nesıeni paıdalana otyryp, baspanany satyp alýǵa; turǵyn úı arendasyn tóleýge, sonyń ishinde baspanany keıinnen satyp alý quqyǵymen jalǵa alýǵa; úlestik baspana qurylysyna turǵyn úı qurylys kooperatıvine qatysqan kezde jarnalardy tóleýge; turǵyn úı qurylysy jınaqtaryn jınaýǵa jáne baspana jaǵdaılaryn jaqsartýǵa.

Atap aıtqanda, qujat áskerı qyzmetshilerdiń baspana problemasynyń basqa da túıtkildi túıinderin tarqatýǵa baǵyttalǵan. Birinshi kezekte, 20 jyl jáne odan kóp ǵumyryn qorǵanys salasyna arnaǵan áskerı zeınetkerlerdi turǵyn úımen qamtamasyz etýdiń mańyzdy máselesi sheshimin tappaq. Olardyń birazy kóship ketýge múmkindigi bolmaǵandyqtan, áli kúnge jabyq jáne oqshaýlanǵan áskerı qalashyqtarda tól baspanasyz qyzmettik turǵyn úılerde ómir súrýge májbúr.

Áskerı zeınetkerlerdiń taǵy bir bóligi tipti eshqandaı baspana berilmeı qyzmetten shyǵarylǵan. Bul rette zańnamamen qandaı da bir turǵyn úı berilmesten, qyzmetten shyǵarylǵan osy áskerı zeınetkerler birjolǵy aqshalaı ótemaqyny aldaǵy 2018 jyly alatyn bolady. ıAǵnı olardyń turǵyn úıge degen quqyǵy tolyq iske asyrylady.

Sonymen qatar, áskerı qalashyqtarda turyp jatqan zeınetkerlerge de birjolǵy ashqalaı ótemaqy tóleý kózdelgen.

«Osynyń arqasynda vedomstvolardyń qoldanystaǵy qyzmettik turǵyn úı qory bosatylady jáne ol baspanalar is basyndaǵy áskerılerdiń kirýine usynylady», - dep túsindirdi Talǵat Muhtarov.

Zańdaǵy kelesi bir jańashyldyqqa toqtalsaq, áskerı qyzmetti ótkerý barysynda qaza tapqan áskerı qyzmetshilerdiń otbasylarynyń baspanasyzdyq máselesi sheshiledi. Atalǵan otbasylarǵa áskerı qyzmetshiniń ómiri qıylǵan óńirdegi jańa turǵyn úıdiń naryqtyq quny mólsherinde birjolǵy aqshalaı ótemaqy tóleý kózdelip otyr.

Munymen qosa, zańnamada áskerı qyzmetin ótkerý kezinde jarymjan bolyp qalǵan nemese aýyr dertke shaldyǵý nátıjesinde áskerı esepten shyǵarylǵan qyzmetshilerdi baspanamen qamtamasyz etý qarastyrylǵan. Bul sanattaǵy áskerılerge de qyzmetin ótegen óńirdegi jańa turǵyn úıdiń naryqtyq quny mólsherinde birjolǵy aqshalaı ótemaqy tóleý usynylady.

Taǵy bir mańyzdy jańa normaǵa toqtalsaq, baspananyń jabyq áskerı qalashyqtar men zastavalarda ornalasýyna baılanysty, olar jekeshelendirýge jatpaıtyndyqtan, bul másele qyzmettik baspanamen qamtamasyz etilgen áskerı qyzmetshilerge qatysty bolyp otyr. Zańnama boıynsha olarǵa sol óńirge tıesili turǵyn úı tólemderi aı saıyn 50 paıyz kólemde aýdarylatyn bolady. Bul óz kezeginde ádiletti bolyp tabylady, sebebi memleket atalǵan áskerılerdi tegin qyzmettik baspanamen qamtamasyz etedi, olardyń kommýnaldyq tólemderin de tolyqtaı memleket kóteredi. Sondyqtan áskerı qyzmetshiniń munyń syrtynda memleket beretin 50 paıyz somasyndaǵy turǵyn úı tólemderin jınaqtap, bankterdiń ıpotekalyq nesıelendirý baǵdarlamalaryna qatysýǵa múmkindigi bar.

Jalpy, turǵyn úı tólemderin alýshylar, qyzmet ótkeretin arnaýly memlekettik organnan nemese Qarýly Kúshterdiń, basqa da áskerler men áskerı qurylymdardyń memlekettik mekemesinen óziniń jeke arnaıy shotyna aýdarylǵan aqsha týraly málimetterdi jyl saıyn talap etýge; jeke arnaıy shotyna paıdalanylmaǵan turǵyn úı tólemderiniń somasyn jınaqtaýǵa; turǵyn úı tólemderin qyzmet ótkeretin jerine qaramastan, Qazaqstannyń kez kelgen óńirinde maqsaty boıynsha paıdalanýǵa quqyly.

Esterińizge sala keteıik, jalpy Qazaqstanda 60 myńnan astam áskerı men kúsh qurylymdardyń ókilderi baspanaly bolady dep kútilýde.