2017 jyly memleket qazynasyna túsetin kiris kólemi artty

ASTANA. QazAqparat - 2017 jyldyń 11 aıynda QR Qarjy mınıstrligi Memlekettik kirister komıteti memleket qazynasyna túsimder boıynsha jospardy asyra oryndady, dep habarlaıdy QazAqparat tilshisi.

Ótken jylmen salystyrǵanda bıýdjet kiristeri 8,4%-ǵa nemese 466 mlrd teńgege artqan.

«Jyl basynan beri Memlekettik kirister komıteti bıýdjetke 6 trln 31 mlrd teńge túsirdi, bul boljamdyq jospardyń 101%-yn quraıdy. 2016 jylmen salystyrǵanda, kiristerdiń ósimi 8,4%-dy nemese 466 mlrd teńgeni qurady», - dedi Memlekettik kirister komıtetiniń tóraǵasy Ardaq Teńgebaev Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, komıtet basshysy salyqtyq jáne kedendik tekserýlerdiń eki esege azaıǵanyn eske saldy.

«Biz qaýip-qaterlerdi basqarý júıesin jetildirý men aqparattyq júıelerimizden alynǵan derekterdi qoldaný arqyly bıznes sýbektilerin qashyqtyqtan baqylaýǵa basa mán berip otyrmyz. Nátıjesinde tekserýler sanyn edáýir azaıta aldyq - ótken jyldyń 11 aıynda 72 myń tekserý júrgizsek, bıyl bul kórsetkish 37 myńdy qurady», - dep óz sózin tolyqtyrdy Teńgebaev.

Sonymen birge, MKK basshysynyń habarlaýynsha, salyqtyq tekserýler nátıjesine sáıkes, memlekettik bıýdjetke 87,6 mlrd teńge óndirilip alynǵan. Ótken jylmen salystyrǵanda, túsim kólemi 35 paıyzǵa artqan.