2017 jyly kásiptik-tehnıkalyq bilimge 84 myń grant bólinedi
Bul týraly búgin QR Parlamenti Májilisinde ótken Úkimet saǵatynda QR Ulttyq ekonomıka mınıstri Qýandyq Bıshimbaev málim etti.
"Áleýmettik-ekonomıkalyq saıasattyń basty mindetteriniń biri halyqty ónimdi jumyspen qamtýdy qamtamasyz etý bolyp tabylady. Bul, eń aldymen, ózin-ózi jumyspen qamtý problemasyn sheshý. Qazirgi ýaqytta ózin-ózi jumyspen qamtyǵan halyq sany 2,2 mln. adamdy quraıdy, olardyń ishinde 60%-dan astamy aýyldarda turady jáne tabystary 60 myń teńgeden tómen. Tórtten bir bóligi jastar. Búgingi kúni ózin-ózi jumyspen qamtyǵan halyqtyń bir bóligi ýaqytsha jumystarmen kún kórýge májbúr ekeni jasyryn emes. Bizdiń mindetimiz olardy ónimdi jumysqa tartý jáne olardyń tabysyn ulǵaıtý", - dep atap ótti mınıstr.
Vedomstvo basshysynyń aıtýynsha, mınıstrlik bul mindetti sheshýdiń eki jolyn kórip otyr.
«Birinshi, kásiptik biliktiligin arttyrý jáne eńbekke jumylýǵa yntalandyrý arqyly ónimdi jumyspen qamtýdy qamtamasyz etý. Ol úshin 2017 jyldan bastap «Jalpyǵa arnalǵan tegin kásiptik-tehnıkalyq bilim berý» jobasy iske qosylatyn bolady. Osy maqsatqa 7 mlrd. teńge kózdeldi, onyń ishinde 2 mlrd. teńge respýblıkalyq bıýdjetten jáne 5 mlrd. teńge jergilikti bıýdjetterge jalpy sıpattaǵy transfertterden qarastyrylǵan. Bul kásibı mamandyqtar boıynsha granttar sanyn 84 myńǵa deıin ulǵaıtýǵa múmkindik beredi", - dedi ol.