2017 jyly eldi mekender tóńiregindegi jerlerge túgendeý júrgiziledi

ASTANA. QazAqparat - 2017 jyly eldi mekender tóńiregindegi jerlerge túgendeý júrgiziledi. Bul týraly búgin «QR-nyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» QR zańy jobasyn qoǵamdyq tyńdaý barysynda elimizdiń Aýyl sharýashylyǵy vıtse-mınıstri Erlan Nysanbaev málim etti, dep habarlaıdy QazAqparat.

«Eń birinshiden, biz bul zań jobasynda aýyl sharýashylyǵy maqsatyndaǵy jerlerdi de, jaıylymdardy da tıimsiz paıdalanylǵan jaǵdaıda qaıtaryp alýdy kózdep otyrmyz. Ekinshiden, 2017 jyly jerdi qaıtaryp alý úshin biz eldi mekenderdegi jaǵdaıdyń qandaı ekendigin naqty túsinýimiz qajet. Osyǵan oraı biz jańa jyldan bastap bastap eldi mekender mańyzyndaǵy jáne odan tysqary jatqan jerlerge túgendeý júrgizýdi bastaımyz. Osydan keıin baryp jerdi qaıtaryp alý úshin naqty qadamdarǵa baramyz», - dedi Nysanbaev.

Vıtse-mınıstrdiń atap ótýinshe, aýyl sharýashylyǵy jerleriniń úlken kólemin «bir qolǵa» berýge jol bermeý maqsatynda zań jobasymen qazaqstandyqtarǵa oblystardyń ákimshilik aýdandary sheginde jalǵa berilýi múmkin aýyl sharýashylyǵy jerleriniń eń joǵary mólsherin ár oblysta alaptar boıynsha belgileý qarastyrylǵan. Beriletin jerlerdiń utymdy paıdalanylýyn tekserý maqsatynda turaqty monıtorıng júrgizý kózdelgen. Jalǵa alýdyń alǵashqy 5 jylynda jyl saıyn, kelesi kezeńderde sýarmaly egistikke árbir úsh jylda, tálimdi jerge ár 5 jylda monıtorıng júrgiziletin bolady.

Munan bólek, shekara mańy beldeýinde jáne memlekettik shekaranyń aımaǵynda jerlerdi berý talaptaryn qatańdatý qarastyrylǵan. Onda sheteldikterge, azamattyǵy joq adamdarǵa, sheteldik zańdy tulǵalarǵa jáne sheteldikterdiń qatysýy bar zańdy tulǵalarǵa jerdi ıelenýge shekteý qoıylady.

Aýyl turǵyndarynyń mal jaıýy úshin jaıylymdyq alqaptardyń jetispeýshiligi problemasyn sheshýde zań jobasymen eldi mekender mańynda turǵyndardyń jeke maldaryn ustaý muqtajdaryn qanaǵattandyrýǵa qajetti jaıylymdardyń kólemi anyqtalatyn bolady.