2017 jyly ekonomıkanyń ósim 3,4 paıyzdan kem bolmaıdy
«9 aıdyń qorytyndysy áleýmettik-ekonomıkalyq damýdyń barlyq salalarynda jaǵymdy úrdisti kórsetip otyr. Osyny eskere otyryp, 2017 jyldyń qorytyndysy boıynsha biz ekonomıkanyń ósýin kem degende 3,4 paıyz deńgeıinde kútemiz», - dedi T. Súleımenov.
Onyń sózine qaraǵanda, ekonomıkanyń damýyna oń áserin tıgizetin ınvestıtsııalardyń ósý serpini birtindep jaqsarýda. Aǵymdaǵy jylǵy 9 aıda negizgi kapıtalǵa ınvestıtsııalar kólemi 4,4 paıyzǵa ósti.
Investıtsııanyń neǵurlym ósýi saýdada jáne qurylysta, sondaı-aq jylý jáne sýmen jabdyqtaý jelilerin jańǵyrtý nátıjesinde ónerkásipte baıqalady. Aıtalyq, sýmen jabdyqtaý jáne káriz júıesi salalarynda ınvestıtsııalar 46,5 paıyzǵa, elektrmen jabdyqtaýda - 15,6 paıyzǵa ósti.
«Qarjylandyrýdyń syrtqy kózderi boıynsha tómendeý baıqalsa, negizgi kapıtalǵa ınvestıtsııalardyń ósýi eń aldymen ishki kózderden qamtamasyz etilgen. Máselen, ishki kózderi esebinen ınvestıtsııalar naqty mánde 19,2 paıyzǵa ósti, bul rette syrtqy kózder esebinen - tórtten úsh bóliginen asa tómendedi. Osylaısha, ishki kózder esebinen qyrkúıekte ınvestıtsııalardyń ósýi jyldamdady», - deıdi mınıstr.
Budan bólek ol iskerlik belsendilik aıasynda ekonomıkany nesıeleýdiń ósýi baıqalǵanyn sóz etti. Aǵymdaǵy jylǵy 1 qyrkúıektegi jaǵdaı boıynsha negizinen uzaq merzimdi nesıelerdiń 11 trln teńgeni qurap, 4,5 paıyzǵa deıin ósýi esebinen kredıtter jyldyń basymen salystyrǵanda 2,6 paıyzǵa ósti. Qysqa merzimdi nesıeler kólemi 6,4 paıyzǵa tómendep, 2,1 trln teńgeni qurady.
Jańa kredıtter negizinen saýda, baılanys, kólik jáne qurylys sııaqty ekonomıkanyń óndiristik emes salalaryna baǵyttalǵanyn atap ótý qajet.
Álemdik naryqtardaǵy qolaıly baǵa konıýktýrasy jáne eksporttyń ımporttan basym bolýy saýda teńgeriminde joǵary kórsetkishterge qol jetkizýge septigin tıgizdi. Máselen, aǵymdaǵy jylǵy 8 aıda saýda teńgeriminiń saldosy 62,7%-ǵa ósip, 11,9 mlrd AQSh dollaryn qurady.
Jalpy eldiń syrtqy saýda aınalymy 26,4%-ǵa ulǵaıa otyryp, 48,7 mlrd. AQSh dollaryn qurady.
«Turaqty makroekonomıkalyq jaǵdaıdyń aıasynda tikeleı sheteldik ınvestıtsııalardyń jalpy kirisi 2017 jylǵy birinshi jartyjyldyqta 8,6%-ǵa ósip, 10,5 mlrd AQSh dollaryna deıin jetti. Qazan aıynyń basynda Altyn-valıýta qorynyń 10,2 paıyzǵa ósýiniń esebinen eldiń halyqaralyq rezervteri 89,4 mlrd AQSh dollaryn qurady, bul Altyn-valıýta qorynyń eń tómengi deńgeıinen 3 eseden asa artyq», - dedi Súleımenov.