2017 jyly avıatasymaldaý tarıfin retteý Azamattyq avıatsııa komıtetine beriledi - Á. Isekeshev
Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine jol-kólik ınfraqurylymyn, kóliktik logıstıkany jáne avıatasymaldy damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn. Atalǵan qujat Elbasynyń «100 naqty qadam» Ult josparyn júzege asyrýdy kózdeıdi.
Zń jobasy boıynsha áýe keńistigin paıdalaný salasynda memlekettik retteý, baqylaý jáne qadaǵalaý tetigin jasaý kózdeledi. Sonyń ishinde halyqaralyq áýejaılarǵa biryńǵaı talaptar engiziledi, bul júkterdi avıatsııalyq tasymaldaý barysynda júkterdi ótkizý ýaqytyn 10 kúnnen 4 saǵatqa deıin azaıtady.
«Budan bólek, Ult josparynyń 68-qadamyna sáıkes, 2017 jyly avıatasymaldaý tarıfterin retteý ýákiletti organǵa - Azamattyq avıatsııa komıtetine beriletin bolady. Avıatsııa salasynyń memlekettik retteý máselesi de jetildiriledi. Bul rette Ulybrıtanııanyń avıatsııalyq qyzmet úlgisi paıdalanylmaqshy. Ondaı ozyq úlgi ushýlardyń sapasyn arttyrý, olardyń qaýipsizdigin qamtamasyz etý jáne ushqyshtar daıarlaý boıynsha asa mańyzdy baǵyt bolyp tabylady», - dedi Investıtsııalar jáne damý mınıstri Áset Isekeshev.
Mınıstrdiń sózine qaraǵanda, Qazaqstan osy maqsattardy eńserý úshin Brıtanııa azamattyq avıatsııasymen tyǵyz yntymaqtastyqty jandandyra túsedi. Qazirgi tańda jetekshi avıatsııa ákimshilerimen kelissózder bastalǵan. «Bunyń nátıjesinde 2020 jyldarǵa qaraı qazaqstandyq avıatsııa qyzmetiniń IKAO standarttaryna sáıkestik deńgeıi 64 paıyzdan 80 paıyzǵa deıin joǵarylaıdy. Osynyń arqasynda Qazaqstannyń kóliktik júıesi álemdik júıege tıimdi ıntegratsııalanady», - dedi mınıstr.