2017 jyldyń 5 aıynda ekonomıkalyq ósim 4,1 protsentti qurady - mınıstr

ASTANA. QazAqparat - 2017 jyldyń 5 aıynda ekonomıkalyq ósim 4,1 protsentti qurady. Bul týraly búgin halyqpen eseptik kezdesý ótkizý barysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Aǵymdaǵy jyly syrtqy jaǵdaıdadyń jaqsara túsýine baılanysty ekonomıkalyq belsendiliktiń jáne ekonomıkanyń shynaıy sektorlaryndaǵy kórsetkishterdiń jaqsarýy baıqalady. Aldyn ala málimetterge sáıkes bıylǵy jyldyń 5 aıyndaǵy eldiń ekonomıkalyq ósimi 4,1 protsentti qurady. Al ótken jyldyń dál osy kezeńinde 0,2 protsentke quldyraý baıqalǵan edi», - dedi mınıstr.

Onyń aıtýynsha, ekonomıka ósimine óndirý jáne óńdeý ónerkásipteri, qurylys pen kólik salalary úles qosýda. 5 aıdyń ishinde aýyl sharýashylyǵy 2,7, saýda 2,6, baılanys 2,4 protsentke ósip otyr.

«Ekonomıkalyq ósimniń oń qarqynyn qoldaýdaǵy basty sharttardyń biri ınvestıtsııalyq belsendiliktiń artýy boldy. Aǵymdaǵy jyldyń 5 aıynda negizgi kapıtaldaǵy ınvestıtsııa kólemi 5,2 protsentke ósti», - dedi Súleımenov.

Mınıstrdiń aıtýynsha, elimizdiń syrtqy saýda aınalymy suranystyń qaıta jandanýyna jáne osy jyldyń qańtar-sáýir aılarynda kelisimshart baǵalarynyń ósýine baılanysty 25,7 protsentke artqan. Onyń ishinde eksport 34, al ımport 13,1 protsentti quraıdy.

«Syrtqy saýda aınalymynda da oń saldo baıqalady. Ol 6,6 mlrd. dollardan asyp, 1,7 ese ósti», - dedi ol.