2016 jyly «Samuryq-Qazyna» «Nurly jol» baǵdarlamasy aıasynda 10 myń páterdiń qurylysyn qarjylandyrady

ASTANA. QazAqparat - «Samuryq-Qazyna» Jyljymaıtyn múlik» AQ «Nurly jol» baǵdarlamasy aıasynda jalpy kólemi 490 myń sharshy metr bolatyn 10 myń páterdiń qurylysyn qarjylandyrady. Bul týraly búgin «Samuryq-Qazyna» Jyljymaıtyn múlik» AQ Basqarma tóraǵasy Baýyrjan Mamytalıev málim etti.

«Bıyl Jyljymaıtyn múlik qory «Nurly jol» baǵdarlamasyn iske asyrýǵa kirisedi. Buryn qor bul baǵdarlamanyń operatory bolǵan joq edi», - dedi B.Mamytalıev.

Onyń aıtýynsha, bıyl aqpan aıynda QR Prezıdenti Úkimettiń keńeıtilgen otyrysynda ekonomıkadaǵy aýyr kezeńderge baılanysty jeke qurylys salýshylardy qoldaý baǵdarlamasy arqyly qurylys salasyna jan bitirýdi tapsyrǵan bolatyn. Osy maqsattarǵa Jyljymaıtyn múlik qoryna 97 mlrd teńge bólindi.
Qarjy 10 jyldyq merzimge deıin berilmek.

«Jyljymaıtyn múlik qory turǵyn úı qurylysyn júrgizýdi qurylys kompanııalarymen memlekettik-jeke menshik seriktestik prıntsıpteri boıynsha uıymdastyrady. Olarǵa 24 aı ishinde joba aıasynda salynǵan páterlerdiń barlyq pýlyn satýǵa quqyq beriledi. Eger joba ýaqytynda bitpese, atalǵan nysan qordyń ıeligine 20 paıyzdyq jeńildikpen beriledi», - deıdi B.Mamytalıev.

Nysandy sapaly ári merziminde aıaqtaı alǵan qurylys kompanııalary jańa jobalarǵa tapsyrys ala alady. Osylaısha, «Nurly jol» baǵdarlamasy aıasynda salynatyn turǵyn úılerdiń ýaqytyly paıdalanýǵa berilýine jáne jańa jumys oryndarynyń ashylýyna múmkindikter jasalyp otyr.

Sonymen qatar, qurylys kompanııalaryna jańa talaptar engizilgen. Olardyń ıeliginde ınjenerlik kommýnıkatsııalyq ınfraqurylymy bar jer telimi, saraptama jasalǵan jobalyq-smetalyq qujattamasy men 20 paıyz qarjylyq úlesi bolýy shart.

«Samuryq-Qazyna» Jyljymaıtyn múlik» AQ bıyldyń ózinde «Nurly jol» baǵdarlamasy aıasynda jalpy kólemi 490 myń sharshy metr bolatyn 10 myń páterdiń qurylysyn qarjylandyrady», - dep atap ótti ol.