2016 jyly QR Sýdıalarynyń minez-qulyq qaǵıdattary men qaǵıdalarynyń jańa ádep kodeksi qabyldanady
Atap aıtqanda, Joǵarǵy Sotta Qazaqstan Respýblıkasy Joǵarǵy Sotynyń janyndaǵy Halyqaralyq keńestiń birinshi otyrysy bolyp ótti. Otyrystyń kún tártibine sáıkes, ınvestıtsııalyq daýlar uǵymdaryn anyqtaýdyń tásilderi, sondaı-aq Qazaqstan Respýblıkasy sýdıalarynyń minez-qulyq qaǵıdattary men qaǵıdalary ádep kodeksiniń jańa jobasy talqylandy.
«Sýdıalarynyń minez-qulyq qaǵıdattary men qaǵıdalarynyń ádep kodeksi jaıynda aıtatyn bolsaq, qoǵam bir orynda turǵan joq jáne únemi damý úderisin jalǵastyrýda. Sondyqtan da sýdıanyń moraldyq-etıkalyq beınesine jańa talaptar alǵa tartylýda jáne «100 naqty qadam» Ult josparyn júzege asyrý turǵysynda Sýdıalar odaǵymen jańa Ádep kodeksiniń jobasy ázirlendi. Qujat jobasy 5 taraýda, 30 baptan turady. Atalǵan joba Joǵarǵy Sottyń saıtynda jarııalanyp, keńinen talqylanyp jatyr. Esterińizde bolsa, qujat Joǵarǵy Sotta qańtarda tanystyrylǵan edi. Ony 2016 jyly jetinshi kezekten tys Sýdıalar sezinde qabyldaý josparlanyp otyr»,-dedi A. Qydyrbaeva.
QR Joǵarǵy soty janynan Halyqaralyq keńesti qurý «100 naqty qadam» Ult josparynyń 25-qadamyn júzege asyrý aıasynda qamtylǵan. «Sheteldik jáne halyqaralyq sottardyń úzdik standarttary boıynsha sot isterin júrgizýdi qamtamasyz etý úshin Joǵarǵy Sot janynan bedeldi sheteldik sýdıalar men zańgerler qatysatyn halyqaralyq keńes qurý. Keńes qazaqstandyq sot júıesin jetildirý máseleleri boıynsha Joǵarǵy Sotqa keńes berip otyrady»,-delingen Ult josparynda.
Halyqaralyq keńes týraly erejeni 2016 jyldyń 15 qańtarynda Joǵarǵy Sot qaýlysymen bekitti. Keńes quramyna qazaqstandyq ǵalymdarmen qatar, shet elderdiń bedeldi zańgerleri endi.