2016 jyly Qazaqstan 24 myń tonna ýran óndirýdi kózdeýde

ASTANA. QazAqparat - 2016 jyly Qazaqstan 24 myń tonna ýran óndirýdi kózdeýde. Bul týraly búgin halyqpen eseptik kezdesý ótkizgen QR Energetıka mınıstri Qanat Bozymbaev málim etti.

«2015 jyly ýran óndirisi 23 myń 805 tonnany qurady. 2016 jyldyń 4 aıy ishinde 8,1 myń tonna ýran óndirilgen. 2016 jyly 24 080 tonna ýran shyǵarý josparda bar», - dep habarlady ol.

Energetıka mınıstri Qazaqstan ýran óndirýde álem boıynsha kóshbasshy el ekendigin eske sala ketti. Qazirgi ýaqytta álemdegi ýrannyń 40 paıyzy Qazaqstan jerinen shyǵyp otyr. Shıkizattyń ózge túrlerine qaraǵanda, ýrannyń bási joǵary bolmaq jáne damý áleýeti de myqty.

«Sondyqtan biz bul salany saqtaýymyz kerek. Kóshbasshylyǵymyzdy nyǵaıta otyryp, reaktorly-ıadrolyq otyn tsıkline deıin ártaraptandyrylǵan, atom ónerkásibiniń kóldeneń yqpaldastyrylǵan kásiporyndar keshenin qurýymyz kerek», - dedi mınıstr.