2016 jyly bos oryndar sanynyń basym kópshiligi Aqmola, Qostanaı, Ońtústik Qazaqstan, Aqtóbe, Jambyl oblystarynda tirkeldi

ASTANA. QazAqparat - «Eńbek» (www.enbek.kz) portalynyń málimetinshe, 2016 jyldyń basynan bastap Qazaqstandaǵy bos oryndar týraly habarlamanyń basym kópshiligin Aqmola, Qostanaı, Ońtústik Qazaqstan, Aqtóbe, Jambyl oblystarynyń kásiporyndary men uıymdary usyndy, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Aǵymdaǵy jylǵy qańtar men mamyr aılary aralyǵynda portaldaǵy bos oryndardyń basym kópshiligi óndiris jáne ónerkásip salasyndaǵy mekemelerden kelip tústi.

Jumys izdeýshi azamattar kóp jaǵdaıda qyzmetterdiń kelesi túrlerin qarastyrady: aqparattyq tehnologııalar salasy; keńse jumysy; aýtsorsıng, frılans; esep isi men aýdıt; medıtsına, farmatsevtıka (dáriger-kosmetolog, medıtsınalyq statıst, dıetolog dáriger, klınıkalyq zerthananyń dáriger-zerthanashysy); munaı, gaz, energetıka; óndiris jáne ónerkásip (prorab, óndiristik-tehnıkalyq bólim basshysy, ınjener-jobalaýshy).

Óz kezeginde jumys berýshiler bolashaq qyzmetkerdi izdeý barysynda kelesi maman ıelerin qarastyrady: júıelik admınıstrator, programmıst; geologııa jáne ken oryndaryn barlaý bóliminiń basshysy; satý boıynsha dırektor; ınjener-defektoskopıst; salyq mamany; qujat aınalymyn júrgizýshi/keńse menedjeri; elektromehanık; usta-jóndeýshi.

Portal aqparattaryna saı, jumys berýshilerdiń 50%-y bos oryndarǵa qoıylar sharttarynda joǵarǵy jáne JOO-dan keıingi bilimdi talap etedi, 25%-y orta bilikti tehnıkalyq mamandarǵa zárý.

Sonymen birge, portalda jumys berýshiler múmkindigi shekteýli azamattar úshin birqatar bos oryndar usynady. Olarǵa kelesi mamandyqtar boıynsha jumys usynylady: aǵylshyn tiliniń aýdarmashysy, kopıraıter (úıden jumys isteý), stýdenttik jáne kýrstyq jumys jazý avtory (úıden jumys isteý), endokrınolog dáriger, bas esepshi, esepshi, operator-irikteýshi (poshta qyzmetinde), elektrshi. 

Esterińizge sala keteıik, «Eńbek» portaly - Qazaqstandaǵy jumysqa ornalastyrý máseleleri boıynsha arnaýly ınternet resýrsy. Portalda aýdıo-beıne baılanys arqyly onlaın áńgimelesý múmkindigi qarastyrylǵan. Búginde portal qorynda 21 myńnan astam bos oryndar bar.