2016 jyly bos oryndar sanynyń basym kópshiligi 5 oblysta tirkeldi

ASTANA. QazAqparat - «Eńbek» (www.enbek.kz) portalynyń málimetinshe, 2016 jyldyń basynan bastap Qazaqstandaǵy bos oryndar týraly habarlamanyń basym kópshiligin Aqmola, Qostanaı, Ońtústik Qazaqstan, Aqtóbe, Jambyl oblystarynyń kásiporyndary men uıymdary usyndy. Bul týraly QR Densaýlyq saqtaý jáne áleýmettik damý mınıstrliginen habarlandy.

«Aǵymdaǵy jylǵy qańtar men mamyr aılary aralyǵynda portaldaǵy bos oryndardyń basym kópshiligi óndiris jáne ónerkásip salasyndaǵy mekemelerden kelip tústi. Jumys izdeýshi azamattar kóp jaǵdaıda qyzmetterdiń kelesi túrlerin qarastyrady: aqparattyq tehnologııalar salasy; keńse jumysy; aýtsorsıng, frılans; esep isi men aýdıt; medıtsına, farmatsevtıka (dáriger-kosmetolog, medıtsınalyq statıst, dıetolog dáriger, klınıkalyq zerthananyń dáriger-zerthanashysy); munaı, gaz, energetıka; óndiris jáne ónerkásip (prorab, óndiristik-tehnıkalyq bólim basshysy, ınjener-jobalaýshy)»,-dep atap ótilgen vedomstvo málimetinde.

Óz kezeginde jumys berýshiler bolashaq qyzmetkerdi izdeý barysynda kelesi maman ıelerin qarastyrady: júıelik admınıstrator, baǵdarlamashy; geologııa jáne ken oryndaryn barlaý bóliminiń basshysy; satý boıynsha dırektor; ınjener-defektoskopıst; salyq mamany; qujat aınalymyn júrgizýshi keńse menedjeri; elektromehanık; usta-jóndeýshi.

Portal aqparattaryna saı, jumys berýshilerdiń 50 paıyzy bos oryndarǵa qoıylar sharttarynda joǵarǵy jáne JOO-dan keıingi bilimdi talap etedi, 25 paıyzy orta bilikti tehnıkalyq mamandarǵa zárý.

«Sonymen birge, portalda jumys berýshiler múmkindigi shekteýli azamattar úshin birqatar bos oryndar usynady. Olarǵa kelesi mamandyqtar boıynsha jumys usynylady: aǵylshyn tiliniń aýdarmashysy, kopıraıter (úıden jumys isteý), stýdenttik jáne kýrstyq jumys jazý avtory (úıden jumys isteý), endokrınolog dáriger, bas esepshi, esepshi, operator-irikteýshi (poshta qyzmetinde), elektrshi»,-delingen habarlamada.