2016 jyly 18 respýblıkalyq, 59 oblystyq deńgeıdegi basshy qylmystyq jaýapkershilikke tartyldy

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy Sybaılas jemqorlyqqa qarsy is-qımyl jónindegi komıssııanyń otyrysy ótti. 

Onda QR Sybaılas jemqorlyqqa qarsy strategııasyn iske asyrý jónindegi 2015-2017 jyldarǵa arnalǵan is-sharalar josparynyń jáne «Sybaılas jemqorlyqqa qarsy is-qımyl týraly» Zańnyń oryndalý barysy qaraldy, dep habarlaıdy QazAqparat.

Jıyndy ashqan Gúlshara Ábdiqalyqova  Memleket basshysynyń tapsyrmasy aıasynda Sybaılas jemqorlyqqa qarsy strategııa men «Sybaılas jemqorlyqqa qarsy is-qımyl týraly» Zańnyń negizine jemqorlyq áreketterdiń aldyn alýǵa basa mán berilgendigin atap ótti.

«Jumystyń negizgi baǵyty memlekettik qyzmet salasynda, kvazımemlekettik jáne jekemenshik sektorda, sot pen quqyq qorǵaý organdarynda jemqorlyqqa qarsy turý, qoǵamdyq baqylaý ınstıtýtyn engizý, sybaılas jemqorlyqqa qarsy mádenıet deńgeıin qalyptastyrý jáne halyqaralyq yntymaqtastyqty damytý bolyp otyr», - dedi Memleket basshysy.

Otyrys barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary A.Shpekbaevtyń baıandamasy tyńdaldy. Onyń aıtýynsha, sybaılas jemqorlyqqa qarsy strategııada josparlanǵan 64 sharanyń 95 paıyzy iske asty, qalǵany osy jyly aıaqtalady. Ótken jyly ókiletti organmen 156 memlekettik organnyń qyzmetindegi sybaılas jemqorlyq áreketterine taldaý jasaldy. 2 myńnan asa jemqorlyq quqyq buzýshylyq jasaýǵa yqpal etken mán-jaılardy joıý jóninde usynym hat engizildi. Jemqorlyqqa qarsy turýda jazanyń bultartpastyǵy men zań ústemdiginiń qaǵdıalary qamtamasyz etildi. Máselen, 2016 jyly 18 respýblıkalyq mańyzy bar, 59 oblystyq, 134 qalalyq jáne aýdandyq deńgeıdegi basshy qylmystyq jaýapkershilikke tartyldy. Anyqtalǵan 13,6 mlrd. teńge kólemindegi zalaldyń 5,3 mlrd. teńge nemese 39 paıyzy óteldi.

Jıyn sońynda Memlekettik hatshy Sybaılas jemqorlyqqa qarsy strategııany iske asyrý boıynsha kezekti jospar ázirleý jóninde tapsyrma berdi.

Aıta keteıik, respýblıkalyq komıssııanyń selektorlyq rejimdegi otyrysqa beınebaılanys arqyly Astana, Almaty qalalarynyń jáne oblystardyń  ákimderi, sybaılas jemqorlyqqa qarsy is-qımyl  jónindegi óńirlik komıssııalardyń músheleri qatysty.