2016 jylǵa arnalǵan QR Qarýly Kúshteri jaýyngerlik daıarlyǵynyń negizgi baǵyttary belgilendi

ASTANA. QazAqparat - 2016 jyly QR Qorǵanys mınıstri belgilegen jaýyngerlik daıarlyqtyń sapasyn arttyrý, áskerı qyzmetshilerdi klassıkalyq jaýyngerlik is-qımyldardy, ıaǵnı, taýly jáne eldi mekenderdegi qorǵanys, shabýyldaý, marsh jáne jaýyngerlik is-qımyldardy júrgizýge, jaıaý júris marshtaryn jasaý, onyń ishinde taýlarda, qysta shańǵy tebýge, strategııalyq, jedel-taktıkalyq jáne taktıkalyq oqý-jattyǵýlarǵa qatysýy sııaqty tapsyrmalarǵa erekshe nazar aýdarylady. Bul týraly QR Qorǵanys mınıstrliginiń baspasóz qyzmetinen habarlady.

«Aǵymdaǵy jylǵy mańyzdy aspektilerdiń biri oqý materıaldyq-tehnıkalyq bazany jetildirýdi jalǵastyrý jáne nusqaýshylar rólinde dalalyq sabaqtar men tapsyrmalardy oryndaýǵa serjanttar quramyn daıyndaý, sondaı-aq Qazaqstan Qarýly Kúshteri komandalarynyń «ArMI-2016» Armııalyq halyqaralyq oıyndarǵa qatysýy, onyń ishinde, Qazaqstannyń áskerı polıgonynyń aýmaǵynda alǵash ret ótetin «Mergendik shep» jáne «Artıllerııalyq atys sheberleri» atty eki saıys bolyp tabylady. Jalpy alǵanda, osy jyly qazaqstandyq armııa áskerı qyzmetshileriniń jaýyngerlik daıarlyǵyndaǵy negizgi kúsh-jiger áskerlerdiń jaýyngerlik qabilettiliginiń joǵary deńgeıin ustap turýǵa, jaýyngerlik daıarlyq sabaqtaryn uıymdastyrý men ótkizý sapasyn arttyrýǵa baǵyttalady», - delingen habarlamada.

Vedomstvo aqparatyna qaraǵanda, ótken oqý jylynda 3 600-den asa oqý-jattyǵý, onyń ishinde ártúrli qarýdan 21 000-nan asa praktıkalyq oq atýlary ótkizilgen. Áýe kemelerindegi ushyp ótý saǵaty 16 000-nan asa saǵatty, korabldi jaýyngerlik oqý-jattyǵýlardy pysyqtaý 380-nen asa saǵatty jáne áskerlerdiń dalalyq shyǵýyn pysyqtaý 680-nen asa saǵatty qurady.

Bul rette Qorǵanys mınıstrligi árbir ásker túriniń aldynda jeke tapsyrmalar turǵandyǵyn basa atap ótken.

Qurlyq áskerlerinde - zamanaýı soǵys pen qarýly shıelenisterdiń sıpatyna sáıkes áskerı bólimder men quramalardyń jaýyngerlik jáne jumyldyrý ázirligin ári qaraı arttyrý, jeke qurammen jumys jasaý sapasyn arttyrý, áskerı tártip pen quqyqtyq tártipti nyǵaıtý. Áýe qorǵanysy kúshterinde - jaýyngerlik ázirliktiń joǵary deńgeıin ustap turý, barlyq sanattaǵy áskerı qyzmetshilerdiń kásibıligi men jeke daıarlyǵyn arttyrý, kúndiz jáne túnde, qarapaıym jáne kúrdeli meteojaǵdaılarda ushý quramynyń pılotajdaý sheberligin jetildirýi, áýe urysyn júrgizý, áýe jáne jerústi nysanalar boıynsha jaýyngerlik qoldaný. Áskerı-teńiz kúshterinde - jaýyngerlik kezekshilikti uıymdastyrý, korablderdiń qatysý jóninde áskerı basqarýdyń joǵary turǵan organdarymen ózara is-qımyl jasaý.