2016 jyldyń qańtarynan memlekettik qyzmetshilerge jalaqy tóleýdiń jańa júıesi enýi múmkin
Eske salaıyq, otyrysta «100 naqty qadam» Ult josparyn júzege asyrý máseleleri talqylanǵan bolatyn.
QR Ulttyq ekonomıka mınıstr, koalıtsııa múshesi Erbolat Dosaevtyń aıtýynsha, bes reformanyń birinshi baǵyty - zamanaýı, derbes, kásibı memlekettik apparatty qurýǵa baǵyttalyp, ol ekonomıkalyq baǵdarlamalardyń sapaly oryndalýyn, sapaly memlekettik qyzmetter kórsetýdi qamtamasyz etýi tıis.
«Bul baǵytta jańa jalaqy júıesin engizý kózdeledi. 2016 jyldyń qańtarynan bastap engizilýi múmkin jalaqy tóleýdiń jańa júıesi jumystar nátıjesine qaraı negizdeledi. Budan bólek, memlekettik qyzmetshilerdi júıeli túrde oqytyp, biliktiligin arttyrý zań júzinde bekitiledi. Quqyq qorǵaý organdaryn qosa alǵanda memlekettik qyzmetke kandıdattardy irikteý ortalyqtandyrylady, bul rette Memlekettik qyzmet isteri agenttiginiń rólin kúsheıtý josparda bar», - dedi E. Dosaev.
Mınıstrdiń aıtýyna qaraǵanda, aldaǵy ýaqytta memlekettik qyzmetshilerdiń barlyq deńgeıin, sonyń ishinde quqyq qorǵaý organdaryn da qamtıtyn «Memlekettik qyzmet týraly» jańa zań qabyldaý josparlanǵan.
«Jalpy osy baǵyttaǵy jumystyń negizgi ózegi retinde biz «Sıngapýr úlgisin» alyp otyrmyz. Memleket basshysy kótergen barlyq bazalyq máseleler, sonyń ishinde memlekettik qyzmetshiniń jalaqysyn kóterý, memlekettik qyzmet mártebesin arttyrý - bul basym baǵyttar bolyp tabylady», - dedi mınıstr E. Dosaev.
Sonymen qatar, ol memlekettik qyzmet salasyndaǵy ózgeristerdiń túbegeıli, radıkaldy sıpatta órbıtinin atap ótti. «Bul jaı ǵana sylap-sıpap, ber jaǵynan jasalatyn ózgerister emes, kosmetıkalyq áıtpese dýaldyń boıaýy sekildi jumys ta emes. Biz múldem jańa krıterıılerdi bútkil memlekettik qyzmet salasyna toptastyramyz. «A» korpýsyn qalyptastyrý - birinshi qadam ǵana, endigi kezekte sonyń aıasynda álemdik ozyq tájirıbelerdi transformatsııalaı otyryp, biz alǵa qoıǵan minetterdi atqaratyn bolamyz», dedi E. Dosaev.