2016 jyldyń 1 qańtarynan bastap Qazaqstan Ult josparyn iske asyrýǵa kirisedi - N.Nazarbaev

ASTANA. QazAqparat - 2015 jyldyń sońyna deıin 2016 jyldyń 1 qańtarynan bastap Ult josparyn iske asyrý úshin zańnamaǵa ózgerister engizý mindeti tur. Bul týraly «Habar» telearnasyndaǵy «Nazarbaevpen eń bastylar jaıynda...» derekti suhbat-fılminde Memleket basshysy habarlady.

«Qazirgi kezde Dúnıejúzilik banktiń dárejeleýi boıynsha ortasha damyǵan memleket, tabysy ortasha memleket dep atalyp otyrmyz. Bul da jaman emes, bul óte jaqsy. Biz kóbin basyp ozdyq. Endi aldymyzǵa álemniń damyǵan 30 memleketiniń qataryna kirý maqsatyn qoıdyq. Asyǵý kerek, bir orynda turyp qalýǵa bolmaıdy. Jańa ekonomıkalyq saıasat sol úshin qajet. Bes ınstıtýtsıonaldyq reforma, 100 qadam... búginde barlyǵy oqyp otyr, túsinikteme berip, onyń durys jasalǵanyn aıtýda...», - dep atap ótti Memleket basshysy.

Qazaqstan Prezıdentiniń aıtýynsha, bul úlken jumys Qazaqstannyń bolashaǵy, halyq úshin atqarylyp otyr.

«Men komıssııany (Jańǵyrtý boıynsha ulttyq komıssııa) olardyń ne istep úlgergenin tyńdaımyn. Bizdiń maqsatymyz - 1 qańtardan bastap osy baǵyttardyń barlyǵy boıynsha jumys isteý úshin 2016 jyldyń qańtaryna deıin zańnamaǵa ózgerister engizý», - dep túıindedi sózin N.Nazarbaev.