2016 jyldan bastap QHA medıatorlary 9 myńnan astam daýdy sheshti
«Medıatsııa ınstıtýtyn damytý QHA-nyń basym baǵyttarynyń biri. Bul jaıynda Assambleıa sessııasynda Prezıdent Nursultan Nazarbaev aıtqan bolatyn. Birinshiden, QHA kásibı medıatorlarmen syndarly ózara is-qımyldy qalyptastyrý turǵysynda jumystardy atqarýda. Sonymen qatar biz daýly jaǵdaılardyń aldyn alý men olardy sheshýde barlyq qurylymdarmen jáne etnomádenı birlestiktermen medıatıvtik tehnologııalardy paıdalaný tájirıbesin keńeıtýge talpynýdamyz. Ekinshiden, búginde Assambleıa medıatsııasynyń jalpyrespýblıkalyq ınklıýzıvti jelisi quryldy. Onyń quramyna 2 207 Qoǵamdyq kelisim keńesteri, 2 141 Analar keńesi, sondaı-aq dostyq úılerindegi 17 medıatsııa kabınetteri enip otyr. QHA Medıatsııa keńesi qurylyp, oblystarda 13 keńes jumys istep jatyr. Aýdandar, aýyldar deńgeıinde qoǵamdyq kelisim jáne medıatsııanyń 1 117 kabıneti jasaqtaldy. Olar óz kezeginde týyndaıtyn máseleler boıynsha memlekettiń, qoǵamdyq ınstıtýttardyń jáne azamattardyń ózara is-qımylynyń tirek alańdaryna aınalýda»,-dedi Toǵjanov.
Onyń sózine qaraǵanda, QHA medıatsııasynyń jelisi keri baılanys júıesinde qyzmet etýde. Atalǵan salada jumystyń tıisti tájirıbesi jınaqtaldy. Tek 2016 jyly jáne 2017 jyldyń basynda elimizde sheshilgen daýlardyń sany 9 260-qa jetti.
Sheshilgen daýlardyń basym bóligi Ońtústik Qazaqstan (3 287), Soltústik Qazaqstan (1 637), Aqtóbe (1 344) oblystarynda tirkeldi.
Atap aıtqanda, Assambleıa medıatorlarynyń biryńǵaı reestrine 3 549 adam engizilgen, onyń ishinde kásibı medıatorlar 971 adam. Munymen qosa bedeldi azamattar qatarynan QHA-nyń qoǵamdyq medıatorlary 2 578-ge jetti.
Belgili bolǵandaı, sotqa deıingi talqylaý kezinde 3 781 daý sheshilip, sonyń arasynda kásibı medıatorlar 2 773 talas-tartysty bitimge keltirgen. Al qoǵamdyq medıatorlar 1 108 daýdyń betin qaıtarýǵa qaýqarly boldy. Sheshimin tapqan máselelerdiń negizgi bóligin ádeýmettik-turmystyq, eńbek jáne azamattyq daýlar qamtyp otyr.