2016 jyldan bastap Qazaqstanda energetıka salasynda jańa naryq engiziledi

ASTANA. QazAqparat - 2016 jyldan bastap Qazaqstanda energetıka salasynda jańa naryq engiziledi. Bul týraly búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» Zańynyń jobasyn tanystyrǵan QR Energetıka mınıstrligi Atom jáne energetıkalyq qadaǵalaý men baqylaý komıtetiniń tóraǵasy Suńǵat Esimhanov aıtty.

«Aǵymdaǵy jyldyń basynda Memleket basshysy Úkimettiń keńeıtilgen otyrysynda bergen tapsyrmalary ishinde elektr energetıkasy salasyna baılanysty naqty 2-3 tapsyrma boldy. Sol tapsyrmalar «100 naqty qadam» Ult josparynda kórinis tapty. Naqty aıtsaq, 50-shi qadam elektr energetıkasy salasyn qaıta qurý, «biryńǵaı satyp alýshy» modelin engizýdi qarastyrsa, 52-shi qadam elektr energetıkasy salasyna ınvestıtsııa tartýdy yntalandyratyn jańa tarıf saıasatyn engizýdi kózdeıdi», - dedi ol.

Komıtet tóraǵasynyń atap ótýinshe, sońǵy 7 jyl boıy elimizde shekti tarıf saıasaty júrgizilgen. Sol saıasattyń arqasynda energetıka stansalarda kúrdeli jóndeý jumystary tııanaqty atqarylyp, 1 trln. teńgege jýyq ınvestıtsııa tartyldy.

«Osy ýaqyt ishinde jumys istep turǵan energııa qýattarynyń 5 myń MVt-yna kúrdeli jóndeý júrgizilip, qosymsha 3 myń MVt-qa jýyq energııa qýaty engizildi. Biraq, 2015 jyly shekti tarıf aıaqtalady. Sondyqtan 2016 jyldan bastap energetıka salasynda jańa naryq engiziledi», - dedi S.Esimhanov.

Onyń aıtýynsha, jańa zań jobasynda elektr qýatynyń naryǵy men biryńǵaı satyp alýshyny engizý kózdelgen. Zań jobasyn qabyldaý memlekettik bıýdjetten qosymsha qarjy shyǵyndaryn, sondaı-aq Qazaqstan Respýblıkasy úshin, onyń ishinde ınvestıtsııalyq ahýalǵa da, keleńsiz áleýmettik-ekonomıkalyq saldarǵa da ákep soqpaıdy.