2016 jyldan bastap adam saýdasynyń qurbandaryna arnaıy áleýmettik kómek kórsetý standarty elimizdiń birqatar óńirinde engiziledi
Atalǵan másele boıynsha QR Іshki ister mınıstri Qalmuhanbet Qasymov baıandama jasady. Komıssııa músheleri ǵalamdyq aýqymdaǵy problemaǵa - adam quqyǵyn buzýdyń eleýli túri bolyp tabylatyn jáne ulttyq shekaraǵa bólinbeıtin adam saýdasyna erekshe kóńil bóldi. Qazirgi tańda Qazaqstanda adam saýdasymen kúres úshin halyqaralyq standarttarǵa sáıkes keletin zańnamalyq baza qurylǵany atap ótildi.
Qazaqstan Respýblıkasy adam quqyqtary salasyndaǵy 60-tan astam kópjaqty ámbebap sharttardyń qatysýshysy bolyp tabylady, osynyń ishindegi 15-i halyqaralyq konventsııalar, sharttar jáne kelisimder quldyqtyń qazirgi zamanǵy nysandaryna qarsy is-qımylmen tikeleı baılanysty. Buǵan qosa, Adam quqyqtary jónindegi komıssııanyń «Qazaqstan Respýblıkasyndaǵy adam saýdasyna qarsy is-qımyl salasyndaǵy adam quqyqtaryn qorǵaýdyń ózekti problemalary» atty arnaıy baıandamasynyń usynymdaryn oryndaý maqsatynda ýákiletti memlekettik organdar adam saýdasynyń qurbandaryna arnaıy áleýmettik kómek kórsetýdiń standartyn ázirledi. Bul standart 2016 jyldan bastap pılottyq rejimde Qostanaı, Ońtústik Qazaqstan oblystarynda, Astana jáne Almaty qalalarynda engiziletin bolady.
Sóz sóılegender memlekettik jáne quqyq qorǵaý organdarynyń úkimettik emes uıymdarmen adam saýdasyna baılanysty quqyq buzýshylyqtardyń aldyn alý men trafık qurbandaryna arnaıy áleýmettik qyzmet kórsetý salalaryndaǵy ózara is-qımyldaryn kúsheıtýge erekshe nazar aýdardy.
Komıssııanyń otyrysynda ázirlengen usynymdar Memleket basshysynyń, Qazaqstan Respýblıkasy Parlamenti men Úkimetiniń nazaryna jetkiziletin bolady. Komıssııa otyrysyna Qazaqstan Respýblıkasy bıliginiń zań shyǵarýshy, atqarýshy jáne sot tarmaqtarynyń ókilderi, halyqaralyq jáne úkimettik emes uıymdardyń, daǵdarystyq ortalyqtardyń, advokatýranyń, jurtshylyqtyń jáne BAQ ókilderi qatysty.