2016-2020 jyldarǵa arnalǵan jekeshelendirý josparyna memlekettik aýdıt júrgiziledi

ASTANA. QazAqparat – Bıyl 2016-2020 jyldarǵa arnalǵan jekeshelendirý josparynyń oryndalý tıimdiligine memlekettik aýdıt júrgiziledi. Bul týraly Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Kvazımemlekettik sektordaǵy árbir uıym qurylymynda uıymnyń alqalyq organyna tikeleı esep beretin aýdıtordyń sertıfıkaty bar qyzmetkerlerden turaqtyn ishki aýdıt qyzmeti bar. Іshki aýdıt qyzmeti ózderiniń biliktilik daǵdylaryn arttyrý boıynsha jumysty turaqty negizde júrgizedi. Óz qyzmetterinde ulttyq jáne halyqaralyq standarttardy qoldanady. Sonymen qatar osy jyldyń birinshi toqsanynda Joǵary aýdıt palatasy 2016-2020 jyldarǵa arnalǵan jekeshelendirýdiń keshendi josparynyń oryndalý tıimdiligine memlekettik aýdıt júrgizýdi josparlap otyr», - dep atap ótedi Álıhan Smaıylov jaýabynda.

Onyń atap ótýinshe, Úkimet kvazımemlekettik sektor sýbektileri qyzmetiniń ashyqtyǵyn arttyrý úshin kezeń-kezeńimen is-sharalar qabyldap jatyr. Máselen, zańnamalyq negizde kvazımemlekettik sektor sýbektilerine qoǵam ókilderin tarta otyryp, qoǵamdyq keńester qurý talaby qoıylǵan.

«Atalǵan norma engizilgennen keıin kvazımemlekettik sektor sýbektleriniń qoǵamdyq keńesterine damý josparynyń júzege asyrylýyna, strategııalyq jáne qarjylyq qujattarǵa, jyldyq bıýdjettiń oryndalýyna, qarjylyq esep-qısapqa, óndiristik-sharýashylyq qyzmetke jáne basqa da máselelerge monıtorıng júrgizý júktelgen», - dedi Premer-Mınıstr.