2015 jyly Ulttyq qordan avtojolǵa 180 mlrd. teńgege tarta qarjy baǵyttalady

ASTANA. QazAqparat - Bıyl Ulttyq qordan avtojol jobalaryn iske asyrýǵa 180 mlrd. teńgege tarta qarjy baǵyttalady. Bul týraly búgin Ortalyq kommýnıkatsııalar qyzmetinde «Nurly jol» baǵdarlamasyn iske asyrý máselesine arnalǵan brıfıngte QR Ulttyq ekonomıka mınıstriniń birinshi orynbasary Marat Qusaıynov málim etti.

«Baǵdarlamanyń negizgi baǵyttaryna dálirek toqtalatyn bolsaq, birinshisi - kóliktik-logıstıkalyq ınfraqurylymdy damytý. Avtojol salasyndaǵy jobalardy iske asyrýǵa Ulttyq qordan 301,3 mlrd. teńge somasyna qarajat bólinedi, onyń ishinde 2015 jyly - 178 mlrd. teńge, 2016 jyly - 123,3 mlrd. teńge. Bul rette HQU qaryzdary esebinen 6,3 mlrd. AQSh dollaryn qosa qarjylandyrý qamtamasyz etiledi», - dedi ol.

Qusaıynovtyń sózine qaraǵanda, 2015 jyldan 2020 jylǵa deıingi kezeńde iri avtojol jobalary iske asyrylady, osy oraıda «Ortalyq-Ońtústik», «Ortalyq-Shyǵys», «Ortalyq-Batys» jáne respýblıkalyq mańyzy bar basqa joldardy rekonstrýktsııalaý qamtylyp otyr.

«Shuǵyla» qaǵıdaty boıynsha ózara bir-birimen baılanysqan eldiń árbir óńiri úshin ónimniń ózindik qunynyń kólik shyǵyndaryn qysqartýdan túsetin ekonomıkalyq paıda, óńiraralyq tasymaldaý jyldamdyǵyn ulǵaıtý jáne tıisinshe jolǵa ketetin ýaqyt pen joldy paıdalanýshylardyń paıdalaný shyǵyndaryn qysqartý, sondaı-aq JKO sanyn tómendetý esebinen jobalardy iske asyrýdyń tıimdiligine qol jetkiziledi. Jobalardyń ınvestıtsııalyq fazasy kezeńinde 200,0 myńǵa jýyq jumys orny qurylady»,- dep atap ótti mınıstrdiń birinshi orynbasary.