2015 jyly tegin medıtsınalyq kómektiń kepildi kólemin kórsetýge 227 mıllıard teńge bólinbek

ASTANA. QazAqparat - 2015 jyly tegin medıtsınalyq kómektiń kepildi kólemin kórsetýge el bıýdjetinen 227 mıllıard teńge bólý qarastyrylýda. Bul týraly búgin QR Densaýlyq saqtaý jáne áleýmettik damý mınıstrliginde ótken brıfıngte Medıtsınalyq qyzmetke aqy tóleý komıteti tóraǵasynyń orynbasary Inna Stratýlat málim etti.

Onyń atap kórsetkenindeı, básekelestik ortany damytý maqsatynda mınıstrlik jeke menshik medıtsınalyq uıymdar arasynda tegin medıtsınalyq kómek kórsetýge memlekettik tapsyrys berýdi ulǵaıtyp keledi.

"Bul adamdardyń kez kelgen oblysta tegin medıtsınalyq qyzmet alýyna múmkindik beredi. Sebebi Qazaqstanda turǵylyqty jerine qaramastan qyzmet alýǵa múmkindik beretin birizdi júıe engizilgen. Sonymen qatar jeke menshik klınıkalardy jıi tarta otyryp, halyqtyń tegin medıtsınalyq kómekke degen qoljetimdiligin arttyrýǵa jol ashylady", - deıdi I. Stratýlat.

Onyń aıtýynsha, 2014 jyly memlekettik tapsyrys aıasynda tegin medıtsınalyq kómek kórsetýge qatysqan 557 medıtsınalyq uıymnyń 161-i - jeke menshik. Sońǵy bes jyl ishinde tegin medıtsınalyq kómektiń kólemi arttyrylyp, ondaǵy jeke menshik sektordyń úlesi 4 esege kóbeıgen.