2015 jyly Qazaq handyǵynan syr shertetin 20 serııaly telehıkaıa túsiriledi

ASTANA. QazAqparat - Qazaq handyǵynan syr shertetin 20 serııaly telehıkaıa túsiriledi. Bul týraly búgin Ortalyq kommýnıkatsııalar qyzmetindegi brıfıngte QR Mádenıet jáne sport mınıstri Arystanbek Muhamedıuly málim etti.

«Aldaǵy jyly Qazaq handyǵyna baılanysty ǵylymı konferentsııalar, derekti jáne kórkemdik fılmder shyǵady. Onyń ishinde Elbasynyń tapsyrmasymen Qazaq handyǵyna arnalǵan 20 cerııaly úlken telehıkaıa túsiriledi. Qazirgi kezde bizdiń ǵalymdarymyzdyń anyqtaýymen tarıhymyz anyq jolǵa túsken kezde, árıne, biz ony kórkemdik janrǵa shyǵarýymyz kerek», - dedi mınıstr.

Osy oraıda ol bul baǵytta tıisti jumystar bastalǵanyn aıta kele, «2015 jyldyń qańtarynan bastap bul serıaldardy túsirýdi iske asyramyz», - dedi ol.

Aıta keteıik, aldaǵy jyly Qazaq handyǵynyń 550 jyldyǵyna qatysty aýqymdy sharalar uıymdastyrylmaq. Mereıtoıǵa oraı 100-ge jýyq iri shara ótkizý josparlanyp otyr.