2015 jyly elorda mańyndaǵy Taldykól sarqyndy sýdy jınaqtaý orny joıylady - I.Tasmaǵambetov
Bul týraly búgin Elbasy N.Nazarbaevtyń qatysýymen ótken elordanyń ári qaraı damýy máselerine arnalǵan keńes barysynda Astana qalasynyń ákimi Imanǵalı Tasmaǵambetov málim etti.
«Sizdiń kelesi tapsyrmańyz Taldykól sarqyndy sýdy jınaqtaý ornyn joıýmen baılanysty. Bul aıtarlyqtaı iri joba, is júzinde júzege asyrylýy 5 jylǵa, 2011-2015 jyldarǵa arnalǵan», - dedi ol.
Onyń atap ótýinshe, ótken jyly kárizdik tazalaý qurylǵysyna arnalǵan ınfraqurylym nysany men tazarǵan sarqyndy sýdy Esil ózenine aǵyzatyn kollektor salynǵan. Al aǵymdaǵy jyly qurylysty uıymdastyrý jobalaryn jańǵyrtý jumystary aıaqtalyp, tazartýǵa arnalǵan bloktyń qurylysy bastalady.
«2013 jyldyń ózinde-aq Taldykólge sarqyndy sýdyń quıylýyn toqtatý jáne táýligine 118 myń tekshe metr sý tazalaıtyn qurylǵynyń birinshi kezegin salý josparlanýda. 2014 jyly sarqyndy sýdy jınaý ornynyń joıý jumystary jalǵasady», - dedi I.Tasmaǵambetov.
Qala basshysynyń aıtýyna qaraǵanda, 2015 jyly qalanyń kárizdik tazalaý qurylǵysynyń ónimdiligi táýligine 254 myń tekshe metrge jetkiziledi. Qazirgi ýaqytta bul kólem 136 myń tekshe metrdi qurap otyr.
«Barlyq oryndalǵan sharalar tazartylǵan sarqyndy sýdyń sapasyn sharýashylyq mańyzdaǵy normaǵa deıin jetkizip, taldykóldi sý burý júıesinen jnaqtaýshy retinde joıýǵa múmkindik beredi», - dedi ol.