2015 jyly 97 myńnan astam azamat arnaýly áleýmettik qyzmettermen qamtyldy - QR DSÁDM
Vedomstvoda atap ótkendeı, 2015 jyly 97,2 myń adam arnaýly áleýmettik qyzmettermen qamtyldy. Onyń ishinde 92,1 myń azamatqa 735 memlekettik mekemelerde, 5,1 myń adamǵa úkimettik emes uıymdarda (ÚEU) arnaýly áleýmettik qyzmetter kórsetildi. Byltyrǵy jyly úkimettik emes uıym sektoryndaǵy arnaýly áleýmettik qyzmet kórsetýmen 81 ÚEU aınalysty.
«Arnaýly áleýmettik qyzmetter - ómirlik qıyn jaǵdaıǵa tap bolǵan adamdarda paıda bolǵan áleýmettik máselelerdi sheshýge baǵyttalǵan, sonymen birge, olarǵa ózge azamattarmen teń dárejede qoǵamdyq ómirge aralasýǵa múmkindik beretin keshendi qyzmet kórsetý», - dep túsindirdi mınıstrlikte.
Bul qyzmetterdi memleket kepildendiredi. Sonymen qatar, atalǵan qyzmet jetimdik, panasyzdyq, áýmeserlik minez-qulyq, múgedektik, jasy ulǵaıýyna baılanysty ózine-ózi qyzmet kórsete almaǵanda, bas bostandyǵynan aıyrý oryndarynan bosap shyqqanda, úısizdik, merziminen buryn shartty bosatý, qatigez qaraý jaǵdaıynda tegin kórsetiledi.
Arnaýly áleýmettik qyzmetter oǵan muqtaj adamnyń tirshilik áreketindegi 8 salasynda: áleýmettik-turmystyq, áleýmettik-psıhologııalyq, áleýmettik-eńbek, áleýmettik-medıtsınalyq, áleýmettik-mádenı, áleýmettik-pedagogıkalyq, áleýmettik-quqyqtyq jáne áleýmettik-ekonomıkalyq baǵyttaǵy jeke erekshelikterin eskere otyryp kórsetiledi.
Arnaýly áleýmettik qyzmettiń bir túri - múgedektigi, psıhonevrologııalyq aýrýlary bar adamdar, sonymen qatar, tirek-qımyl apparattary buzylǵan balalar jáne qarttarǵa arnalǵan ınternat-úılerdiń balama túrin jasaý bolyp tabylady.
«Qyzmet kórsetýdiń mundaı túri qazirgi tańda múgedek balalarǵa arnalǵan kúndizgi bólimderdi belsendi damytý jelisi bolyp tabylady. QR Densaýlyq saqtaý jáne áleýmettik damý mınıstrligi bıylǵy jyly atalǵan qyzmetterdi ÚEU nemese jeke qurylymdarǵa aýtsorsıng túrinde berý arqyly damytý boıynsha jumysty jalǵastyrady. Bul 548 balany óz otbasyna qaıtarýǵa, atalǵan uıymdarǵa baratyn balalardyń 500-den astam ata-anasyn jumysqa ornalastyrýǵa múmkindik berdi», - delingen QR DSÁDM habarlamasynda.
Sonymen birge, statsıonarlyq túrdegi medıtsınalyq-áleýmettik uıymdardy áleýmettik qyzmet kórsetý ortalyqtaryna aınaldyrý arqyly ózge sanattaǵy azamattarǵa bıýdjetten ǵana emes, aqyly negizde atalǵan qyzmetterdi kórsetý josparlanyp otyr.
Jalpy alǵanda, arnaýly áleýmettik qyzmet júıesin engizgennen bastap, qyzmetpen qamtamasyz etilgen azamattardyń sany 2009 jyly 72,4 myń adamnan 2015 jyly 97,2 myń adamǵa (34 %-ǵa) ulǵaıdy.
Esterińizge sala keteıik, 2015 jylǵy 20 aqpanda Memleket basshysy «Múgedekterdiń quqyqtary týraly konventsııany ratıfıkatsııalaý týraly» QR Zańyna qol qoıdy. QR Úkimeti 2012-2018 jyldarǵa arnalǵan Múgedekterdiń quqyqtaryn qorǵaý jáne ómir sapasyn jaqsartý jónindegi is-sharalar josparyn qabyldap, kezeń-kezeńmen iske asyrýda. Atalǵan jospardyń negizgi baǵyttarynyń biri - arnaýly áleýmettik jáne ońaltý qyzmetteriniń tıimdiligin arttyrý bolyp tabylady.