2015 jyly 424 shaqyrym jol jańartylyp, paıdalanýǵa beriledi - «QazAvtoJol»

ASTANA. QazAqparat - Infraqurylymdy damytýdyń «Nurly jol» baǵdarlamasy aıasynda kólik joldaryn damytýdyń barlyq jobalary sapaly ári ýaqytyly júzege asatyn bolady. Bul týraly búgin Ortalyq kommýnıkatsııalar qyzmetinde ótken brıfıngte «QazAvtoJol» UK» AQ basqarma tóraǵasy Ermek Qızatov málim etti.

Basqarma basshysynyń aıtýynsha, búgingi kúni avtojol salasyndaǵy barlyq jobalar óz ýaqytynda júzege asýda. Atap aıtqanda, «Semeı-Qalbataý» ýchaskesiniń 118 shaqyrymy jańǵyrtylǵan. Budan bólek, Astana-Pavlodar, Pavlodar-Semeı aralyǵyndaǵy 496 shaqyrymdy quraıtyn 16 ýchaskede jumystar jandanǵan.

«Osylaısha, Astana kúrejoly Ertis ózeni arqyly salynyp jatqan kópirmen «Pavlodar-Semeı» avtojolyna jalǵasady. Bıyl osy baǵyt boıynsha 102 shaqyrym aıaqtalyp, qalǵan ýchaskeler 2016-2017 jyldary eki kezeńmen qoldanysqa beriledi», - dedi E.Qızatov.

Tutastaı alǵanda, aǵymdaǵy jyly jalpy uzyndyǵy 1300 shaqyrymdy quraıtyn 40 jol ýchaskesinde qurylys-montajdaý jumystary júrgiziledi. 2015 jyldyń qorytyndysy boıynsha 424 shaqyrym jol paıdalanýǵa berilmek.

Aldaǵy josparlarǵa kelsek, «Astana-Almaty» jobasy boıynsha Temirtaý, Qaraǵandy, Balqash, Qapshaǵaı qalalary arqyly jalpy uzaqtyǵy 1282 shaqyrym jol salý josparlanǵan. Al «Astana-Óskemen» jobasy oıynsha jol baǵyty Pavlodar men Semeı qalalary arqyly ótip, onyń jalpy uzaqtyǵy 1018 shaqyrymdy quramaq. Al «Astana-Aqtóbe-Atyraý-Aqtaý» baǵyty keleshekte Atyraý qalasynan Aqtaý men Astrahanǵa shyǵýǵa deıin jalǵaspaq.

Osylaısha, bul baǵytta shamamen 2000 shaqyrym jol jańǵyrtylady.

«Úkimettiń qoldaýy arqasynda barlyq jobalar Ulttyq qor men halyqaralyq qarjy ınstıtattary tarapynan qarjylaı qoldaý kórip otyr. Sondyqtan da «Nurly jol» baǵdarlamasynda qamtylǵan barlyq avtojol salasyndaǵy jobalar sapaly ári ýaqytyly oryndalady», - dedi E.Qızatov.