2015 jylǵa qaraı jalpy respýblıka boıynsha 453 shaqyrymdyq temirjol qurylysyn aıaqtaý kózdeledi

aýryzdyń 15-i. QazAqparat /Qanat Mámetqazyuly/ - 2015 jylǵa qaraı jalpy respýblıka boıynsha 453 shaqyrymdy quraıtyn temirjol qurylysyn aıaqtaý kózdeledi. Búgin Parlament Senatynda «Qazaqstannyń Eýropa elderimen saýda-ekonomıkalyq yntymaqtastyǵynyń perspektıvalary» atty taqyrybynda ótken konferentsııa barysynda Kólik jáne kommýnıkatsııa vıtse-mınıstri Dýlat Kóterbekov osylaı málim etti,

dep habarlaıdy QazAqparat.

«Bunymen qosa, 2015 jylǵa qaraı respýblıka aýmaǵyndaǵy temirjol kóligimen júktiń tranzıttik tasymaly 25 paıyzǵa artady dep boljanyp otyr», dedi vıtse-mınıstr. Onyń aıtýynsha, Eýrazııa kólik dálizi boıynsha yqpaldastyq temirjol salasynda da júzege asýda. Máselen, Kaspıı mańy memleketteriniń ekinshi sammıtinde jańa temirjol qurylysyn salý týraly kelisimge qol jetkizilgen. Bul joba qurylysy Ózen-Qorǵan baǵyty boıynsha ońtústikten Irannyń Kaspıı mańy aýdandaryna qaraı baǵyttalady, al soltústiginde Reseı temirjoldar jelisimen túıisedi. Bunyń ózi Eýropa-Kaspıı mańy-Parsy shyǵanaǵy dálizin qalyptastyratyn bolady. Vıtse-mınıstrdiń sózine qaraǵanda, jobany júzege asyrý Qazaqstan men onyń kórshileriniń ǵana emes, Eýropalyq elderdiń de múddesinen shyǵyp otyr.

«Byltyr Jetigen-Qorǵas baǵytyndaǵy jańa temirjol jelisiniń qurylysy bastaldy. Bul jeli Qytaı men Qazaqstannyń arasyndaǵy ekinshi shekaralyq temirjol ótkelin ashýǵa múmkindik beredi ári Qytaıdan Ortalyq Azııaǵa, Iran men Batys Eýropaǵa, Kavkaz respýblıkalaryna qaraı júkterdi tasymaldaýdyń eń qysqa jolyn qalyptastyrady. Bul jol paıdalanýǵa berilgennen keıingi alǵashqy jyldyń ózinde ondaǵy tasymal jylyna 5 mln. tonna júkti quraıdy dep kútilip otyr. Sonymen birge, osy jańa temirjol arqasynda Qytaıdan Qazaqstannyń ońtústik óńirlerine, Ortalyq Azııa memleketterine deıingi jol 550 shaqyrymǵa deıin qysqarady», dedi D. Kóterbekov.