2015 jyl elimizdiń qoǵamdyq-saıası jáne rýhanı ómiri úshin de erekshe jyl bolǵaly tur - Q.Toqaev
«Keshe Elbasy N.Nazarbaev Indýstrııalandyrý kúni aıasyndaǵy jıyn barysynda «jańa ónimdi jumys oryndaryn kóbirek asha alǵan memleket qana jeńiske jetedi», dep kedergiler men qıyndyqtarǵa toly ýaqytta tabandy eńbek etýdiń mańyzyna aıryqsha nazar aýdardy. Elimiz ındýstrıaldy-ınnovatsııalyq damý baǵdarlamasynyń alǵashqy besjyldyǵyn oıdaǵydaı júzege asyryp, damýdyń nurly jolyna aıaq basty. Túptep kelgende, el ıgiligi úshin ter tógip, aıanbaı eńbek etetin qoǵam memleketti tabysty damý jolyna shyǵaratyn birden bir mańyzdy faktor ekeni daýsyz», - dedi jıyndy qorytyndylaǵan Senat spıkeri.
Budan bólek, Palata Tóraǵasy 2015 jyl - elimizdiń qoǵamdyq-saıası jáne rýhanı ómiri úshin de erekshe bolatynyn atap ótti.
«Barsha qazaqstandyqtar Qazaq handyǵynyń 550 jyldyǵyn, Ata zańymyz ben Qazaqstan halqy Assambleıasynyń 20 jyldyǵyn jáne Uly Jeńistiń 70 jyldyǵyn qarsy alýǵa daıyndalýda. Tól tarıhymyzdyń uly qundylyqtaryn qasterleý ulttyq múddemiz ben qazaqstandyq otansúıgishtikti nyǵaıtýdyń túpqazyǵy bolatyny anyq», - deı otyryp spıker Q.Toqaev áriptesterin kele jatqan Jańa jylmen quttyqtady.