2015-2017 jyldarǵa bilim berý baǵdarlamasyna jyl saıyn 962,2 mln. teńge qarastyrylyp otyr
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Bilim jáne ǵylym vıtse-mınıstri Esenǵazy Imanǵalıev málim etti.
Onyń atap ótýinshe, qarajat joǵary jáne joǵary oqý ornynan keıin bilim berý salasyndaǵy jobalardy zamanaýı kadrlarmen qamtamasyz etýge, ınnovatsııalyq turǵydaǵy bilim berý baǵdarlamasyn engizýge jáne jańa zerthanalyq qurylǵylardy oqytýǵa baǵyttalady. Bazalyq joǵary oqý oryndarynda 24 jańa bilim berý baǵdarlamalary jasalyndy. 24 zerthana quryldy.
«Zerthanany ashýǵa 10 mlrd. teńge, sonymen birge 3 mlrd. teńge 2015-2016 jyldarǵa, 4 mlrd. teńge 2017 jylǵa qarastyrylǵan. 2015-2017 jyldarǵa bilim berý baǵdarlamasyn ázirleýge jyl saıyn 962,2 mıllıon teńge kóleminde bıýdjet qarjysy kózdelip otyr», dedi ol.
Sonymen qatar onyń atap ótýinshe, 2015-2016 oqý jylynan bastap bazalyq joǵary oqý oryndarynda IIDMB-2 aıasynda magıstranttardy oqytý jańa bilim berý baǵdarlamasy boıynsha bastalady. Aǵymdaǵy jyly bazalyq joǵary oqý oryndarynda beıindi magıstratýra boıynsha 1900 orynǵa memlekettik bilim berý tapsyrysy ornalastyryldy. Al 2017 jyldyń sońyna deıin QR Bilim jáne ǵylym mınıstrliginde bazalyq joǵary oqý oryndary men kolledjderde ınfraqurylymdy damytý ári materıaldyq- tehnıkalyq bazamamen qamtamasyz etý josparlanýda.