2014 jyly sottarda qaralǵan isterdiń 4 paıyzy sybaılas jemqorlyq qylmysqa qatysty boldy
Búgin QR Joǵarǵy Soty sýdıalarynyń keńeıtilgen keńesinde QR Joǵarǵy Sottyń qylmystyq ister jónindegi qadaǵalaýshy sot alqasynyń tóraǵasy Aqyltaı Qasymov osylaı málimdedi. Eske salaıyq, keńes otyrysy «2015-2025 jyldarǵa arnalǵan Sybaılas jemqorlyqqa qarsy strategııany iske asyrý aıasynda sot organdarynda sybaılas jemqorlyqtyń aldyn alýdyń negizgi baǵyttary» atty taqyryp aıasynda ótýde.
«2014 jyly sybaılas jemqorlyq qylmystarǵa qatysty 807 is boıynsha úkim shyǵaryldy, bul jalpy qylmystyq isterdiń 4 paıyzyn quraıdy. Atalǵan kórsetkish 2013 jyly 886 isti quraǵan bolatyn. Jalpy, quqyq qorǵaý jáne arnaıy organdarmen ózara baılanysa otyryp, sybaılas jemqorlyqtyń aldyn alý, olardyń oryn alýyna qatysty jaǵdaılardy joıýǵa baǵyttalǵan sharalardy jetildirýge jiti mán berildi», - dep atap ótti A. Qasymov.
Toqtala ketetin jaıt, 2015-2025 jyldarǵa arnalǵan Sybaılas jemqorlyqqa qarsy strategııa aıasynda QR Joǵarǵy Soty 2015 jylǵy sot júıesindegi sybaılas jemqorlyqqa qarsy is-sharalar kesheni jobasyn ázirleýde. Osyǵan oraı, keńeste kóterilgen máselelerdiń barlyǵy atalǵan josparǵa enetin bolady.