2014 jyly Qazaqstan 3 mlrd. teńgeniń mal sharýashylyǵy ónimderin eksporttaýdy kózdeıdi
14:23, 18 Aqpan 2014
ASTANA. QazAqparat - 2014 jyly Qazaqstan shamamen 2,9 mlrd. teńgege mal sharýashylyǵy ónimderin eksporttaýdy josparlaýda. Bul týraly búgin Astanada Ortalyq kommýnıkatsııalar qyzmetinde ótken brıfıngte «QazAgro» ulttyq kompanııasynyń basqarma tóraǵasy Dýlat Aıtjanov málim etti.
«2014 jyly Qazaqstan shamamen 3 mlrd. teńgege mal sharýashylyǵy ónimderin eksporttaýdy kózdeýde», - dep atap ótti ol.
Onyń aıtýynsha, iri qara maldyń eksporttyq áleýetin damytý jobasyn iske asyrý aıasynda «QazAgro» kompanııasy 75 sharýashylyq reprodýktorlary qurylǵan.
«2013 jyly holdıng qarjylandyrǵan jobalar Reseı, Belarýs elderine 1870 tonna et pen et ónimderin eksporttady, sonyń ishinde 1400 tonna et Máskeýge jóneltilgen. 890 tonna juqa teri Reseı, Italııa jáne QHR elderine jiberildi», - dedi ol.