2014 jyly elordada 70 ardagerdiń páterinde jóndeý jumystary júrgizildi
Astanadaǵy áleýmettik saıasatty iske asyrýdyń bir baǵyty - áleýmettik álsiz toptarǵa kómek kórsetý bolyp tabylady. Áleýmettik kómek Uly Otan soǵysy ardagerleri men olarǵa teńestirilgen tulǵalarǵa jáne tyl eńbekkerlerine kórsetiledi.
Soǵys ardagerlerine respýblıkalyq ardagerler uıymy qoǵamdyq birlestiginiń Astana qalalyq bólimshesi de járdemdesýde. Qyzmetkerler ardagerlerge kún saıyn kómektesip, olardyń densaýlyǵyn baqylaýǵa alady.
Demeýshilerdiń esebinen ardagerlerdiń páterlerinde qolma-qol «jedel járdem» shaqyrýǵa múmkindik beretin arnaıy «dabyl túımesi» ornatylǵan. Ardagerlerge tegin medıtsınalyq kómek kórsetiledi. Budan bólek, ótken jyly 70 ardagerdiń páterine jóndeý jumystary júrgizilip, 120 adam «Nura» sanatorııasynda demalyp, em qabyldaýǵa múmkindik aldy.
Astanalyq ardagerler mektepter men ýnıversıtetterge baryp, patrıottyq is-sharalarǵa qatysady. Jeńistiń 70 jyldyǵyna oraı uıym soǵys qaharmandarynyń qatysýymen kólemdi is-sharalar ótkizýdi josparlap otyr.
Eske sala keteıik, Jumyspen qamtý jáne áleýmettik baǵdarlamalar basqarmasynyń málimdeýinshe, aı saıyn jergilikti bıýdjet esebinen Uly Otan soǵysy ardagerlerine jáne olarǵa teńestirilgen tulǵalarǵa:
- kommýnaldyq qyzmet aqysyn tóleý úshin áleýmettik kómek;
- qalalyq jolaýshylar kóliginde júrýge jeńildik;
- tis protezin saldyrý;
- sanatorııalyq-kýrorttyq em qabyldaý;
- bekitilgen dári-dármekter tizimi boıynsha ambýlatorııalyq em qabyldaý kezinde dári-dármekpen qamtamasyz etý;
- UOS ardagerlerine jergilikti merzimdi basylymdarǵa jazylý, monshaǵa jáne shashtarazǵa barý úshin bir jolǵy tólem;
- eleýli kúnder men merekelerde aqshalaı tólem túrindegi áleýmettik járdem usynylady.