2014 jyly «Aq bulaq» baǵdarlamasy aıasynda 109 joba paıdalanýǵa beriledi - ÓDM

ASTANA. 14 qarasha. QazAqparat - 2014 jyly halyqty aýyz sýmen qamtamasyz etý boıynsha «Aq bulaq» memlekettik baǵdarlamasy aıasynda 109 jobany paıdalanýǵa berý josparlanyp otyr, dep habarlady óńirlik damý vıtse-mınıstri Serik Nokın Primeminister.kz saıtyna bergen eksklıýzıvti suhbatynda.

«2014 jyly 109 jobany paıdalanýǵa berý josparlanyp otyr», - dedi S. Nokın.

Onyń aıtýynsha, 2014 jylǵa arnalǵan bıýdjette 194 jobany júzege asyrý qarastyrylǵan, olardyń 109-y josparlanǵan jáne 85-i - kóshpeli jobalar.

«Osy qarajat esebinen halqy shamamen 89 myń adam bolatyn 51 aýyldy ortalyqtandyrylǵan sýmen jabdyqtaýǵa qoljetimdilikpen qamtamasyz etý, halqy 230 myńnan astam adam bolatyn 58 aýylda usynylatyn qyzmet kórsetýlerdiń sapasyn jaqsartý josparlanyp otyr», - dep basyp aıtty ol.

Vıtse-mınıstr aıtyp ótkendeı, búgingi tańda ortalyqtandyrylǵan sýmen jabdyqtaý qoljetimdilikke qazaqstandyq aýyl turǵyndarynyń jartysynyń azy ǵana ıe.